“ပတ်စ်ပို့နှင့် နေထိုင်ခွင့်ဘတ် ရှိသည့် အလုပ်သမား (၇၂)ဦးအား နယ်စပ်သို့ပို့”

 

ထိုင်းနိုင်ငံ၊ နွန်ထဘူရီခရိုင်၊ ဘန်ဘူထောင်မြို့၊ ဘတ်လပ်ယိုင်ကျေးရွှာ၊ ဘန်ကွေစိုင်နွိုင် ခြံအမှတ် (၄၈/၁၂၄-၁၃၁) တွင်ရှိသော ထောက်ကယ်နွိုင် Tao Kae Noi ရေညှိမုန့် စက်ရုံတွင် မတ်လ (၉)ရက်နေ့က ၀င်ရောက် ဖမ်းဆီးခံခဲ့ရသည့် အလုပ်သမားများအား ယမန်နေ့ညဥ့်က နယ်စပ်သို့ ပြန်ပို့လိုက်ပြီးဖြစ်သည်။

နေထိုင် အလုပ်လုပ်ကိုင်ခွင့် စာရွက်စာတမ်း အပြည့်အစုံရှိသည့် မြန်မာအလုပ်သမား (၁၀၆)ဦးအား အလုပ် လုပ်သည့် နေရာနှင့် စာရွက်စာတမ်းပါ နေရာလွဲနေသည်ဟုဆိုကာ ဒေသခံ အာဏာပိုင်များက ပြီးခဲ့သည့် မတ်လ (၉)ရက်နေ့က ဖမ်းဆီးခဲ့သည်။ အလုပ်သမားအချို့ ငွေအမြောက်အများ အကုန်အကျခံပြီး လွတ်မြောက် သွားခဲ့သော်လည်း အမျိုးသမီး(၂၈)ဦးနှင့် အမျိုးသား(၄၄)ဦးတို့မှာ နွန်ထဘူရီ အကျဉ်းထောင်တွင် အကျဉ်းချ ခံထားခဲ့ရပြီး ပြန်လည်ပို့ဆောင်ခြင်း ခံခဲ့ရသည်။

မြန်မာသံရုံးနှင့် ဘန်ကောက် အခြေစိုက် ထိုင်းနိုင်ငံရောက် မြန်မာနိုင်ငံသားများ အဖွဲ့ (BAT)အပြင် ထိုင်းနိုင်ငံ တောင်ပိုင်း ဖန်င အခြေစိုက် ပညာရေးနှင့် ဖွံ့ဖြိုးရေး ဖောင်ဒေးရှင်း (FED)အဖွဲ့တို့ ပူးပေါင်း၍ အလုပ်သမားများ လွတ်မြောက်ရေးအတွက် ကြိုးပမ်းခဲ့ကြသည်။

FED အမှုဆောင် ဒါရိုက်တာ ဦးထူးချစ်က “အလုပ်သမားတွေ ကိုယ်တိုင်ရယ်၊ ကျနော်တို့ အလုပ်သမားအရေးလုပ်တဲ့ လူတွေရယ်နဲ့ မြန်မာအစိုးရတို့ဟာ စနစ်တကျ ပုံစံတစ်ခုချပြီးတော့ သေသေချာချာ ထိထိရောက်ရောက် လုပ်ဖို့ လိုပြီးဆိုတာ ပြလိုက်တဲ့ သဘောပဲဗျ”ဟု ပြောသည်။

အလုပ်သမား မနန်းဝေက “အလုပ်ရုံကို အလုပ်သွင်းပေးတဲ့ ကိုမင်းလှိုင် ဆိုတဲ့ ဗမာပွဲစားနဲ့ အလုပ်ရုံက ထိုင်းတစ်ယောက်တို့ ကျနော်တို့ကို စာရွက်စာတမ်း ပြောင်းပေးဖို့ တစ်ယောက်ကို ဘတ် (၄၀၀၀)စီ ယူထားပြီးဖြစ်တယ်။ သူတို့ ထုတ်ချင်တဲ့ လူတွေကို ထုတ်ပြီး ဒီလူ ခုရှောင်နေတယ်”ဟု ပြောသည်။

အလုပ်သမားများ လွတ်မြောက်ရေးအတွက် တရားရုံး၊ ရဲစခန်းနှင့် အလုပ်ရုံသို့ ရှေ့နေနှင့်အတူ သွားရောက်ပြီး ၀ိုင်းဝန်း ကြိုးပမ်းခဲ့သည့် ထိုင်းနိုင်ငံရောက် မြန်မာနိုင်ငံသားအဖွဲ့ တာဝန်ခံ ဦးကျော်သောင်းက “ထိုင်းမှာ  ကျင့်သုံးနေတဲ့ အလုပ်သမား ဥပဒေက ရွှေ့ပြောင်း အလုပ်သမားတွေအတွက် အကာအကွယ်ပေးတဲ့ ဥပဒေ မဟုတ်ဘူး။ လုပ်ငန်းရှင်နဲ့ အာဏာပိုင်တွေ မြန်မာအလုပ် သမားတွေကို လုပ်ချင်တိုင်း လုပ်လို့ရအောင် လုပ်ထားတဲ့ ဥပဒေမျိုးဖြစ်တယ်။ အလုပ်သမား တွေကိုကြတော့ တစ်ခုခု လွဲနေတာနဲ့ ထောင်ချတယ်။ နယ်စပ် ပြန်ပို့တယ်။ ဥပဒေကို ချိုးဖောက်တဲ့ ထိုင်းလုပ်ငန်းရှင်တွေကို ဘယ်တုန်းကမှ အပြစ်ပေး အရေးယူတာ မရှိဘူး။ မြန်မာ အလုပ်သမားတွေက အခံသက်သက်ပဲ”ဟု ပြောသည်။

သန်းချီရှိသည့် မြန်မာအလုပ်သမားများတွင် ယာယီပတ်စ်ပို့နှင့် စာရွက်စာတမ်းများ အပြည့်အစုံ ရှိနေကြပြီး ဖြစ်သော်လည်း ထိုင်းရဲနှင့် ထိုင်းလုပ်ငန်းရှင်များက နေရာတိုင်းတွင် နည်းအမျိုးမျိုးဖြင့် အခွင့်အရေး ချိုးဖေါက် အနိုင်ကျင့်လျက် ရှိနေသော်လည်း လုံလောက်သည့် အကာအကွယ်များ မရရှိပဲ ရှိနေဆဲဖြစ်သည်။

Ref: GHR

Posted in: ၀၁။ အလုပ်သမားများ သတင်း