လုပ်အားခ တိုးရေး မဲဆောက် SCT အလုပ်သမားများ ဆန္ဒပြ

ယမန်နေ့က SCT စက်ရုံတွင် ဆန္ဒပြနေကြသည့် မြန်မာ အလုပ်သမားများကို ထိုင်းရဲများ စောင့်ကျပ်နေစဉ် (ဓာတ်ပုံ- ဧရာဝတီ)

လုပ်အားခ တိုးမြှင့်ပေးရန် ဆန္ဒပြသည့် မဲဆောက်မြို့SCT သိုးမွေး စက်ရုံရှိ အလုပ်သမားများသည် လုပ်အားခ (ဒါဇင်ကြေး) ၂၅၅ ဘတ် တိုးပေးမည် ဟူသော အလုပ်ရှင်၏ သဘောတူညီချက်ဖြင့် ဆန္ဒပြမှုကို ရပ်ဆိုင်းလိုက်သည်။

သိုးမွေး စက်ရုံမှ အလုပ်သမား ၃၅၀ ခန့်က လုပ်အားခ တိုးမြှင့်ပေးရေး အတွက် ယမန်နေ့ မွန်းလွဲ ၁ နာရီမှ စတင်၍ ၅ နာရီ ခန့် အကြာ ဆန္ဒပြခဲ့ခြင်း ဖြစ်သည်။

“အခြား စက်ရုံတွေ ဒါဇင်ကြေးကို ၂၈၀(ဘတ်ငွေ) လောက်ပေးနေကြတယ်၊ ကျနော်တို့ စက်ရုံမှာက ၂၄၀ ပဲပေးတယ်၊ အဲဒါကို ၂၆၀ တိုးပေးဖို့ အလုပ်ရှင်ကို ပြောတာ သုံးလရှိပြီ အလုပ်ရှင်က မလုပ်နိုင်တဲ့ လူတွေထွက်ဖို့ ပြောတယ်၊ ထွက်မယ့် လူတွေကိုလည်း လုပ်အားခ မရှင်းပေးဘူး၊ ပြဿနာက ဒီကစတာပဲ”ဟု စက်ရုံအလုပ်သမား ကိုအောင်က ဧရာဝတီသို့ ပြောသည်။

ဆန္ဒပြ အလုပ်သမားများနှင့် စက်ရုံအလုပ်ပိုင်ရှင်အကြား ထိုင်းအာဏာပိုင်များ ၀င်ရောက်ညှိနှိုင်းပေးခဲ့သဖြင့် အလုပ်သမားများ တောင်းဆိုထားသည့် ဘတ်ငွေ ၂၆၀ ကို ၂၅၅ ဘတ်နှင့် သဘောတူညီမှုရရှိခဲ့ခြင်းဖြစ်ကြောင်း အလုပ်သမားများက ဆိုသည်။ 

ဆန္ဒပြရာတွင်ပါဝင်သည့် အလုပ်သမား မအေးအေးက“ကျမတို့ အလုပ်သမားတွေ ဘက်က ဆန္ဒမပြချင်ပါဘူး၊ ဒါပေမယ့် အလုပ်ရှင်ဘက်က လုံးဝကို သဘောမတူတဲ့အပြင် ခြိမ်းခြောက်တဲ့ စကားတွေ ပါလာတယ်၊ ဒါကြောင့် ဆန္ဒပြရတာပါ၊ အခု သဘောတူညီချက်တွေ ရတာကလည်း ထိုင်းအာဏာပိုင်တွေရဲ့ ၀င်ရောက်ညှိနှိုင်းပေးလို့ပါ”ဟု ပြောသည်။

အလုပ်သမားများ ဆန္ဒပြသည့် စက်ရုံနေရာသို့ ထိုင်း အာဏာပိုင်များ ရောက်ရှိသွားသော်လည်း အင်အားသုံး ဖြိုခွင်းသည့် သတင်းများ ထွက်ပေါ်လာခြင်း မရှိပေ။ ဆန္ဒပြ အလုပ်သမားများကလည်း ယနေ့ ပြန်လည် အလုပ်ပြန်ဆင်းနေပြီးဟု သိရ သည်။

SCT သိုးမွေးစက်ရုံ အလုပ်သမားတဦးလျှင် လစာငွေ ဘတ်၂ ထောင်မှ ၃ ထောင် အထိသာ ရရှိကြောင်း၊ အလုပ်သမားများမှာ တရက်အလုပ်ချိန် ၈ နာရီသာမက ၁၁ နာရီ အထိ အလုပ်ဆင်းကြရကြောင်း ထိုင်းနိုင်ငံအခြေစိုက် ရောင်ခြည်ဦး အလုပ်သမား အဖွဲ့မှ ကိုမိုးဆွေက ပြောသည်။

“တနေ့ ၁၁ နာရီလုပ်ပြီးတော့ အခု ရနေတာက ဘတ်ငွေ ၂၀၀၀ ပတ်ဝန်းကျင်ဆိုတော့ ဒါ ရှင်းရှင်းပြောရင်တော့ အလုပ်သမား တချို့ မကျေနပ်တာတွေတော့ မကြာခဏဖြစ်တာပေါ့”ဟု ၎င်းက ဆိုသည်။

ထိုင်း အလုပ်သများဝန်ကြီးဌာနက ဒေသအလိုက်သတ်မှတ်ထားသည့် အနိမ့်ဆုံး လုပ်အားခမှာ တာ့ခ်ခရိုင် မဲဆောက် မြို့နယ် အပါအ၀င် တနေ့ ၁၆၂ ဘတ် ဖြစ်သော်လည်း အလုပ်သမားများက သတ်မှတ်ချက်အတိုင်းမရရှိကြောင်း အလုပ်သမား ဆောင် ရွက်နေသော အဖွဲ့များက ပြောဆိုကြသည်။

မြန်မာပြည်သားများအရေး ပူးတွဲလှုပ်ရှားမှု ကော်မီတီ(JACBA) ဥက္ကဋ္ဌ ဦးမိုးကြိုးက“မဲဆောက်ဒေသမှာ တရားဝင် စက်ရုံ အလုပ်ရုံ ၂၀၀ လောက်ရှိတဲ့ အထဲက သတ်မှတ်လုပ်အားခ ၁၆၂ ဘတ် အပြည့်ပေးတဲ့ တီကေဖက်ရှင် အထည်ချုပ် စက်ရုံအပါ အ၀င် ၅ ရုံပဲ ရှိတယ်၊ ကျန်တဲ့ စက်ရုံတွေက ဘတ် ၆၀ ကနေ ၁၀၀ အောက်မှာပဲ ပေးတယ်”ဟု ပြောသည်။

မဲဆောက်တွင် တရားဝင် မှတ်ပုံတင်ထားသည့် စက်ရုံပေါင်း ၂၀၀ ကျော်ရှိပြီး မှတ်ပုံမတင်သည့် စက်ရုံပေါင်း ၃၀၀ ကျော်ရှိ ကြောင်း သတင်းဖော်ပြချက်များအရ သိရသည်။

မြန်မာအလုပ်သမားများသည် မဲဆောက်မြို့နယ် အတွင်း၌ အဓိကအားဖြင့် သိုးမွေး စက်ရုံ၊ အထည်ချူပ် စက်ရုံ၊ ဆောက် လုပ် ရေး လုပ်ငန်းခွင် များနှင့် ရာသီအလိုက် လုပ်ကိုင်ရသော စိုက်ပျိုးရေး၊ မွေးမြူရေး လုပ်ငန်းများ အပါအ၀င် ကျပန်း လုပ်ငန်းများ တွင် လုပ်ကိုင် ကြကြောင်း သိရသည်။ 

မဲဆောက်အခြေစိုက် ဧရာဝတီ သတင်းထောက် နှင့် သန်းထိုက်ဦး ပူးပေါင်းရေးသားသည်။

Posted in: ၀၁။ အလုပ်သမားများ သတင်း