မြစ်ဆုံမှသည် ထာဝရငြိမ်းချမ်းရေးသို့ (ဧရာဝတီ အယ်ဒီတာ့အာဘော်)

နိုင်ငံတော်သမ္မတ ဦးသိန်းစိန်က ဧရာဝတီမြစ်ဆုံဆည် တည်ဆောက်ခြင်းကို လက်ရှိအစိုးရ လက်ထက်တွင် ရပ်ဆိုင်းထားမည် ဆိုသည့် သဝဏ်လွှာ လွှတ်တော်သို့ ပေးပို့လိုက်သည်မှာ အလေးထားကြိုဆိုစရာ ဖြစ်သည်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကလည်း ယနေ့ အလုပ်သမားရေးရာ ဝန်ကြီး ဦးအောင်ကြည်နှင့် တွေ့ဆုံရာတွင် အဆိုပါကိစ္စရပ်အား ကြိုဆိုသည်ဟု ပြောဆိုလိုက်သည်။

သမ္မတ၏ သဝဏ်လွှာပါ နံပါတ် ၅ အချက်တွင် “ဧရာဝတီမြစ် ထိခိုက်ပျက်စီးနိုင်သည့် အချက်များကြောင့် ပြည်သူတချို့မှာ စိုးရိမ်ပူပန်မှု ရှိနေသည်ကို ကြားသိနေရပါသည်။ မိမိတို့ အစိုးရသည် ပြည်သူများ ရွေးချယ်တင်မြောက်သည့် အစိုးရဖြစ်၍ ပြည်သူများ၏ ဆန္ဒကို အလေးထားရပါသည်။ ပြည်သူများ၏ စိုးရိမ်ပူပန်မှုများကို အလေးထား၍ ဖြေရှင်းဆောင်ရွက်ပေးရန် တာဝန်ရှိပါသည်။ သို့ပါ၍ မိမိတို့ အစိုးရလက်ထက်တွင် မြစ်ဆုံဆည် တည်ဆောက်ခြင်းကို မပြုလုပ်စေဘဲ ရပ်ဆိုင်းထားမည်” ဟု ပါရှိသည်။

ဆယ်စုနှစ်ပေါင်းများစွာအတွင်း အာဏာပိုင်များဘက်မှ ပြည်သူလူထု၏ တောင်းဆိုချက်ကို မည်သည့်အခါကမှ မလိုက်လျောခဲ့ သောကြောင့် ယခုလုပ်ရပ်သည် နိုင်ငံတော်၏ စီးပွားရေး စီမံကိန်းတခုအား ပြည်သူ့ဆန္ဒကိုကြည့်၍ ရပ်ဆိုင်းပေးလိုက်ခြင်း ဖြစ်ရာ သမ္မတ၏ ဆုံးဖြတ်ချက်ကို အသိအမှတ်ပြု ကြိုဆို သင့်ပါသည်။

၎င်းအနေဖြင့် ယခုဆုံးဖြတ်ချက်ကို အလွယ်တကူ ချခဲ့ခြင်း မဖြစ်နိုင်ပါ။ ယင်းစီမံကိန်းမှ အတိုက်အခံပြုလာမှု၊ တရုတ်ပြည်သူ့ သမ္မတ နိုင်ငံနှင့် မျက်နှာပျက်ရမှု စသည့် တွေ့ကြုံလာနိုင်သော အခက်အခဲများအား မှန်းဆထားပြီး ဖြစ်ပေလိမ့်မည်။

သို့သော် ထို ထိုသော ရင်ဆိုင်ရနိုင်သည့် အခက်အခဲများကြားမှ ဤသဝဏ်လွှာ ပေးပို့လိုက်ခြင်း ဖြစ်သည်။

သမ္မတ၏ သဝဏ်လွှာပါ အချက်များကို ထောက်ချင့်ခြင်းအားဖြင့် သဘာဝပတ်ဝန်းကျင် ထိန်းသိမ်းရေး ကိစ္စရပ်များသာမက လူ့အခွင့်အရေး ကိစ္စရပ်များကိုပါ အလေးထားကြောင်း သတိပြုမိသည်။

မည်သို့ဆိုစေ ပြည်သူလူထု၏ ဆန္ဒကို လိုက်လျောပေးလိုက်ခြင်းက ဒီမိုကရေစီနိုင်ငံသို့ ခြေလှမ်းရာတွင် အရေးအကြီးဆုံးအချက် ဖြစ်သည်ကို သမ္မတ ဦးသိန်းစိန်က ၎င်း၏ အစိုးရအဖွဲ့အား မြစ်ဆံဆည်စီမံကိန်း ရပ်တံ့မည်ဟု ပြောခြင်းဖြင့် လက်တွေ့ ပြသလိုက်ခြင်း ဖြစ်ပေလိမ့်မည်။

သို့ဆိုလျှင် မြန်မာ ပြည်သူတို့၏ ဆန္ဒဖြစ်သော နိုင်ငံရေးအကျဉ်းသားများ ခြွင်းချက်မရှိ လွှတ်ပေးရေးကိုလည်း မကြာမီ အကောင်အထည် ဖော်ပေးလိမ့်မည်ဟု ယူဆပါသည်။ ထိုကိစ္စနှင့် ပတ်သက်၍ နိုင်ငံခြားရေးဝန်ကြီး ဦးဝဏ္ဏမောင်လွင်က ကမ္ဘာ့ကုလသမဂ္ဂ စင်မြင့်တွင် ကတိကဝတ် ပြုထားသည်ကိုလည်း အသိအမှတ်ပြုပါသည်။

စိမ်းလဲ့ကန်သာဂေဟာ၌ ဒေါ်အောင်ဆန်းစုကြည်နှင့် အလုပ်သမားဝန်ကြီး ဦးအောင်ကြည်တို့ ယနေ့ တွေ့ဆုံကြရာတွင်လည်း အထက်ပါ ကိစ္စရပ်များကဲ့သို့ အထူးအရေးကြီးသော တိုင်းရင်းသားလက်နက်ကိုင်များနှင့် ထာဝရငြိမ်းချမ်းရေး ရရေး၊ ပြည်တွင်း ငြိမ်းချမ်းရေး ကိစ္စရပ်များလည်း ဆွေးနွေးခဲ့သေးသည်။

ထို့ကြောင့် ပြည်တွင်းငြိမ်းချမ်းရေး ရရှိရန် တိုင်းရင်းသား ဒေသများအတွင်း ထိုးစစ်ဆင်နေမှုများကို အမြန်ဆုံးရပ်တံ့ကာ တွေ့ဆုံ ဆွေးနွေးရေး နည်းလမ်းကိုသုံး၍ အဖြေရှာသင့်ပါသည်။

မြစ်ဆုံဆည် တည်ဆောက်မှု ရပ်တံ့ရေးမှသည် နိုင်ငံရေးအကျဉ်းသားများအား ခြွင်းချက်မရှိ လွှတ်ပေးရေးနှင့် တိုင်းရင်းသား လက်နက်ကိုင်များနှင့် ထာဝရ ငြိမ်းချမ်းရေးရရှိသည်အထိ ဒေါ်အောင်ဆန်းစုကြည် အပါအဝင် တိုင်းရင်းသား အဖွဲ့အစည်း များနှင့်အတူ သမ္မတ ဦးသိန်းစိန်ဦးဆောင်သော အစိုးရအဖွဲ့၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနှင့် မြန်မာ့ တပ်မတော်တို့ ပူးပေါင်းဆောင်ရွက်စေလိုကြောင်း တိုက်တွန်းနှိုးဆော် အပ်ပါသည်။
Source: ဧရာဝတီ

Posted in: ၀၃။ မြန်မာ့ သတင်း