လူကုန်ကူးမှု တိုက်ဖျက်ရေး ကုလ အရာရှိကြီး ထိုင်းနိုင်ငံတွင် စုံစမ်းရန် ရောက်ရှိနေ

Ms. Joy Ngozi Ezeilo (photo-get2centra)

ကုလသမဂ္ဂ ဒုက္ခသည်များ ဆိုင်ရာ အေဂျင်စီ၏ လူကုန်ကူးမှု တိုက်ဖျက်ရေးဆိုင်ရာ အထူးကိုယ်စားလှယ် Ms. Joy Ngozi Ezeiloသည် ထိုင်းနိုင်ငံ၏ လူကုန်ကူးမှု တိုက်ဖျက်ရေး လုပ်ငန်းများအား စုံစမ်း စစ်ဆေးရန် ထိုင်းနိုင်ငံသို့ ရောက်ရှိနေကြောင်း သိရသည်။

အထူးကိုယ်စားလှယ်သည် ထိုင်းနိုင်ငံတွင် သြဂုတ်လ (၈)ရက်နေ့တွင် ရောက်ရှိခဲ့ပြီး (၁၉)ရက်နေ့အထိ စုံစမ်း လေ့လာ သွားမည်ဟု သိရသည်။

ယခု ခရီးစဉ်အတွင်း Ms. Joy Ngozi Ezeiloသည် လူကုန်ကူးမှုအတွက် အရေးယူ ဆောင်ရွက်နေသော ထိုင်းအစိုးရ တာဝန်ရှိသူများ၊ တရားရေး ၀န်ထမ်းများ၊ နိုင်ငံတကာနှင့် လူမှုအဖွဲ့အစည်း အသီးသီးမှ ပုဂ္ဂိုလ်များအပြင် ကိုယ်တိုင် လူကုန်ကူး ခံရသူများအား တွေ့ဆုံမေးမြန်းရန် ရှိသည်။
ထိုင်းနိုင်ငံ မဲဆောက်မြို့၊ ချင်းမိုင်မြို့နှင့် ငါးဖမ်း လုပ်ငန်းများတွင် လုပ်ကိုင်နေသည့် မြန်မာရွှေ့ပြောင်း အလုပ်သမား အများစုရှိရာ ဆမွတ်ဆာခွန်နှင့် ထိုင်းနိုင်ငံ တောင်ပိုင်း ဆုံခလာမြို့များသို့ သွားရောက်မည် ဖြစ်ကြောင်း ကုလသမဂ္ဂ ထုတ်ပြန်ချက်အရ သိရသည်။

လူကုန်ကူးမှု တိုက်ဖျက်ရာတွင် ထိုင်းနိုင်ငံ၏ အနေအထားမှာ စောင့်ကြည့်ရမည့်အဆင့် ရှိသော်လည်း မြန်မာနိုင်ငံလောက် မဆိုးဝါးဟု ကုလသမဂ္ဂ၏ သတ်မှတ်ချက်အရ သိရသည်။

ကုလသမဂ္ဂ လူကုန်ကူးမှု တိုက်ဖျက်ရေး United Nations Inter-Agency Project on Human Trafficking (UNIAP)၏ အာရှ ပစိဖိတ် ဒေသတွင်း ဆိုင်ရာ ညှိနှိုင်းရေးမှူး မြန်မာအရာရှိ ဦးမောရစ်က “လူကုန်ကူးမှု တိုက်ဖျက်ရေး ကိစ္စရပ်တွေကို သတ်မှတ်တဲ့ TIER နံပါတ်(၁) ဆိုတာကတော့ လူကုန်ကူမှု တိုက်ဖျက်ရေးကို ကောင်းကောင်းမွန်မွန် လုပ်တဲ့အဆင့် ဖြစ်တယ်။ ထိုင်းနိုင်ငံက အဆင့်(၂)မှာ ရှိပါတယ်။ လူကုန်ကူးမှု တိုက်ဖျက်ရေးကို လုပ်တော့ လုပ်တယ်။ ဒါပေမယ့် စောင့်ကြည့်ရတယ်။ နံပါတ် (၃)ကျတော့ လူကုန်ကူးမှု တိုက်ဖျက်ရေးကို လုံးဝမလုပ်ဘူး ဆိုတဲ့ အဆင့်ဖြစ်တယ်။ ဒီအဆင့်မှာ မြန်မာနိုင်ငံပါ ၀င်ပါတယ်’’ဟု ပြောသည်။

ထိုင်းနိုင်ငံတွင် မြန်မာနိုင်ငံသား အများအပြား လူကုန်ကူး ခံရသဖြင့် ကုလသမဂ္ဂ အနေဖြင့် လူကုန်ကူး ခံရသူများအား အကာအကွယ် ပေးရန် လိုအပ်ကြောင်း၊ လူကုန်ကူးမှုနှင့် အလုပ်သမားအရေး ဆောင်ရွက်နေသည့် ဘန်ကောက် အခြေစိုက် ထိုင်းနိုင်ငံရောက် မြန်မာနိုင်ငံ သားများအသင်း နိုင်ငံခြား ဆက်ဆံရေး တာဝန်ခံ ဦးမျိုးနိုင်က ပြောသည်။

“လူကုန်ကူးခံရတဲ့ မြန်မာ အလုပ်သမားတွေ လုပ်အားခတွေ ဆုံးရှုံးတယ်၊ ကယ်ဆယ်ရေး စခန်းနဲ့ အကျဉ်းထောင် တွေထဲမှာ နှစ်လလောက် နေရတယ်။ သူတို့ ပိုင်ဆိုင်တဲ့ ရွှေစငွေစတွေ အကုန်လုံးကို စခန်းမှာ ထားခဲ့ရတယ်။ တစ်ပြားမှ မပါပဲ မြ၀တီ နယ်စပ်ကို ပြန်ပို့ခံရတယ်။ မြ၀တီက ကိုးသုံးလုံးဂိတ်ထဲမှာ ဘတ်(၂၅၀၀)နဲ့ ရွေးနိုင်မှ အပြင်ကိုထွက် ခွင့်ရတယ် အလုပ်သမားတွေ အရမ်းနစ်နာတယ်”ဟု ပြောသည်။

လူကုန်ကူး ခံရသူများသည် ၎င်းတို့ကို ထိထိရောက်ရောက် မကူညီနိုင်ပါက လူကုန်ကူးမှု တိုက်ဖျက်ရေး အဖွဲ့များ အပေါ် ယုံကြည် ကိုးစားမှု နည်းပါး လာနိုင်ကြောင်း ၄င်းကဆက်ပြောသည်။

Source by : အဝေးဆီကမလေးရောက်ခရီးသည်

Posted in: ၀၄။ ထိုင်းသတင်း