ရင်ကိုထိမှန်စေသော သီချင်းများ

ကိုခင်ဝမ်းကို သိကြတဲ့ လူတိုင်း “ပန်းခရမ်းပြာ” ကို သိကြပါတယ်။

အဲဒီ ပန်းခရမ်းပြာ သီချင်းကို ဖန်တီးခဲ့သူကတော့ ကိုရဲလွင် ပါပဲ။ ရတနာမြိုင် အဆောင်က မိန်းကလေးတွေကို တင်စားရည်ညွန်းပြီး “ရတနာမြိုင် သံပြိုင်တင့်ဆန်းပွင့်နေ” ဆိုတဲ့စာသားတွေ၊ “လမ်း တံတားဖြူ နေရာလေး တေးသံလွမ်းစေကွယ်” ဆိုတဲ့ သမိုင်းဝင် တံတားဖြူ နေရာအဖွဲ့အနွဲ့လေးတွေနဲ့ ချစ်စရာ၊ လွမ်းမောစရာ၊ ကြည်နှုးစရာ တမ်းတ သတိရစရာတွေ အပြည့်နဲ့ လှပစွာ တန်ဆာဆင်ထားတဲ့ သီချင်းလေး တပုဒ်ပါပဲ။

အခုတော့ အဲဒီ သီချင်းကို ရေးစပ်သူ ကိုရဲလွင်ကိုယ်တိုင် vertical vibration တီးဝိုင်းနဲ့ အတူ သီဆို ဖျော်ဖြေထားတာကို ကောင်းကင် (နိုင်ငံပြု အနုပညာ) မဂ္ဂဇင်းမှ စာဖတ်ပရိတ်သတ်များအတွက် တင်ဆက်လိုက်ပါတယ်။


ပန်းခရမ်းပြာ from kaungkin on Vimeo.

“တစိတ်ထဲလား” သီချင်းကို ၁၉၈၀ လောက်က ကိုရဲလွင် ရေးစပ်ခဲ့ပြီး ၁၉၈၂ အတွင်း “မွန်းအောင်” လို့ လူသိများလာစေခဲ့တဲ့ ကိုမွန်းအောင်ရဲ့ ပထမဆုံးခွေဖြစ်တဲ့ “၈/၈၂ အင်းလျား” မှာ လူထုကြားထဲရောက်အောင် ကိုမွန်းအောင်က သီဆိုခဲ့တာ ဖြစ်ပါတယ်။

အခုတော့ ကိုရဲလွင် ကိုယ်တိုင် Vertical Vibration တီးဝိုင်းနဲ့ အတူ သီဆိုထားတဲ့ “တစိတ်ထဲလား” သီချင်းကို ကောင်းကင်က တင်ဆက်လိုက်ပါတယ်။

(သရုပ်ဖေါ် ပန်းချီ-မင်းကျော်ခိုင်)

ကောင်းကင် စာတည်းအဖွဲ့

With One Spirit? from kaungkin on Vimeo.

မြန်မာနိုင်ငံ ဂီတလောကရဲ့ ကိုယ်ပိုင်သံစဉ် ဂီတအနုပညာဖန်တီးမှုအတွက် အရေးပါသူတွေထဲမှာ တေးရေး ကိုရဲလွင်ရဲ့ ကဏ္ဍဟာလည်း အဓိက ကဏ္ဍတစ်ခုဆိုရင် မှားမယ်မထင်ပါဘူး။ မဇ္ဈိမလှိုင်းတီးဝိုင်းအကြောင်းပြောမယ် ဆိုရင်လည်း တေးရေးကိုရဲလွင်ကို ချန်ထားခဲ့လို့မရပါဘူး။

သူ ဖန်တီးပြီး လူကြိုက်များတဲ့ သီချင်းတွေက အတော်များပါတယ်။ “ပန်းခရမ်းပြာ” ပန်းခရမ်းပြာရဲ့ နောက်ဆက်တွဲဖြစ်တဲ့ “ဝေးခဲ့ပြီ ပန်းခရမ်းပြာ”၊ “ဒွိဟစိတ်နဲ့ သုညမှာ” “နဒီမင်္ဂလာ” စတဲ့ သီချင်းတွေဟာ အောင်မြင်တဲ့ ဖန်တီးမှုတွေ ဖြစ်ပါတယ်။

နောက်ထပ် ထူးခြားချက် တစ်ခုကတော့ ကဗျာတွေကို သီချင်းအဖြစ် သံစဉ်ရှာဖွေရာမှာ မူရင်းကဗျာ စာသားများကို ပြောင်းလဲခြင်း၊ ပြင်ပေးရခြင်း၊ ဖြုတ်ပစ်ရခြင်း မရှိဘဲ ချောမွေ့အောင် သံစဉ်ရှာဖွေနိုင်ခြင်းဖြစ်ပါတယ်။ သံစဉ်ရှာရတာ ခက်ခဲတဲ့ ပန်းချီ မောင်ဒီရဲ့ ကဗျာ တစ်ပုဒ်ဖြစ်တဲ့ “သိန်းငှက်ပျိုတို့ရဲ့ သဘာဝ” ကဗျာကို သံစဉ်ရှာရာမှာ ၃ နှစ် အထိအချိန်ယူခဲ့ပြီး မူရင်းကဗျာကို စာသားများကို ပြုပြင်ပေးခဲ့ရခြင်း မရှိဘဲ သီချင်းအဖြစ် အသစ်တဖန် ဖန်တီးပေးနိုင်ခဲ့သူ တစ်ယောက်ဖြစ်ပါတယ်။

အခုလည်း အမျိုးသားဒီမိုကရေစီပါတီဝင်၊ နိုင်ငံရေး အကျဉ်းသားဟောင်းဖြစ်တဲ့ “ဒီချစ်မျိုး” က သူ အကျဉ်းကျစဉ် ထောင်တွင်းကာလမှာ ရေးခဲ့တဲ့ “ပန်းရဲ့လမ်း” ကဗျာကို … ကိုရဲလွင်နဲ့ တွေ့စဉ် သံစဉ်ထည့်ပေးဖို့ ကဗျာလေးကို ပေးခဲ့ပါတယ်။ သံစဉ်ထည့်ဖို့ တောင်းဆိုခဲ့ပေမယ့် ကဗျာပိုင်ရှင်ကိုယ်တိုင် မေ့မေ့ပျောက်ပျောက် ပုံစံထားခဲ့သော်လည်း ကိုရဲလွင်က အခု “ပန်းရဲ့လမ်း” သီချင်းအဖြစ် ဖန်တီးပေးခဲ့တာ ဖြစ်ပါတယ်။

ကိုရဲလွင်ဟာ မဇ္ဈိမလှိုင်းတီးဝိုင်းကို တည်ထောင်ခဲ့သူတွေထဲက တစ်ယောက်ဖြစ်ခဲ့သလို .. ယခု ၂၀၁၀ ခုနှစ် အတွင်းမှာတော့ မျိုးဆက်သစ် ဂီတအနုပညာရှင်တွေနဲ့ အတူ “Vertical Vibration” တီးဝိုင်းကို ပျိုးထောင်ခဲ့ပါတယ်။ “ပန်းရဲ့လမ်း” သီချင်းကိုလည်း Vertical Vibration နဲ့ တီးခတ်ဖျော်ဖြေခဲ့တာ ဖြစ်ပါတယ်။

စာဖတ်ပရိတ်သတ်များအတွက် .... Vertical Vibration က တီးခတ်ထားပြီး ကိုရဲလွင်ကိုယ်တိုင် သံစဉ်ထည့်သွင်း သီဆိုထားတဲ့ “ပန်းရဲ့လမ်း” သီချင်းလေးကို ကောင်းကင် (နိုင်ငံပြု အနုပညာမဂ္ဂဇင်း) မှ တင်ဆက်လိုက်ပါတယ်။

The Path of Flowers from kaungkin on Vimeo.

နာမည်ကျော် ကိုယ်ပိုင်သံစဉ် သီချင်းတွေထဲက "မောင့်လပြည့်ဝန်း"၊ "အားလုံးကို ကျော်ဖြတ်ရမယ်"၊ "ငြိမ်းချမ်းရေး တိုက်ပွဲ"၊ "နောက်ဆုံးအိပ်မက်" စတဲ့ သီချင်းတွေကြားလိုက်တာနဲ့ အဲဒီ သီချင်းတွေကို ဖန်ဆင်းခဲ့တဲ့ အနုပညာရှင် "ကိုနေဝင်း" တွဲပြီး သိကြပါတယ်။

မြန်မာ့ဂီတလောကရဲ့ အဓိကကျတဲ့ အခန်းကဏ္ဍတစ်ခုဖြစ်တဲ့ ကိုယ်ပိုင်သံစဉ် ဖန်တီးမှု သီချင်းကဏ္ဍမှာ မှတ်တိုင်စိုက်ခဲ့တဲ့ အနုပညာရှင် တစ်ဦးဆိုလည်း မမှားပါဘူး။

ကိုနေဝင်း ရေးစပ်ပြီး ကိုယ်တိုင် သီဆိုထားတဲ့ “ငြိမ်းချမ်းရေးတိုက်ပွဲ”သီချင်းကို စာဖတ်ပရိသတ်များအတွက် ကောင်းကင်မဂ္ဂဇင်းက တင်ဆက်လိုက်ပါတယ်။

စစ်ပွဲပြီးစ ယမ်းငွေ့ မပြယ်သေးချိန်၊ ….. (၁၉၇၉ - ၁၉၈၀) ကာလများရဲ့ ရှမ်းပြည် တန့်ယန်းမြို့လေးနဲ့ မီးခိုးငွေ့တွေကြားက “ငြိမ်းချမ်းရေး တိုက်ပွဲ” သီချင်းကို မွေးဖွားခဲ့တာပါ။

Battle for Peace from kaungkin on Vimeo.







အနုပညာဆိုတာ အချိန်နှင့် အရွယ် (သို့မဟုတ်) အရာရာကိုအံတုလို့ သူ့တန်ဖိုးအတိုင်း ထာဝရ တည်ကြည်ရဲရင့် ရှင်သန်နုသစ်နေတယ်ဆိုတာ ဒီရုပ်/သံတွေက သက်သေထူနေပါတယ်။

Posted in: ၀၆။ ရုပ်/သံ