ရန်ကုန်မှ ထိုင်း နယ်စပ်အရောက် ပို့ပေးသည့် လူပွဲစားအလုပ် တွင်ကျယ်

ထိုင်းနိုင်ငံ ရနောင်းဘက်ခြမ်းသို့ သွားမည့် ကော့သောင်းလှေဆိပ် (ဓာတ်ပုံ - s643.photobucket.com)

ထိုင်းနှင့် မလေးရှားနိုင်ငံများသို့ တရားမ၀င် သွားရောက်လိုသူများအား ရန်ကုန်မြို့မှ ကော့သောင်း နယ်စပ်အထိ လူတဦးလျှင် ကျပ် ၃ သိန်းခွဲအထိ ယူဆောင်၍ လူပွဲစားများက ပို့ဆောင်ပေးနေကြောင်း ခရီးသည်များက ပြောသည်။

ရန်ကုန်မှတဆင့် မြန်မာနိုင်ငံတောင်ပိုင်း ကော့သောင်းနယ်စပ်သို့ သွားသူများသည် မန္တလေး၊ မကွေး၊ ရန်ကုန်၊ အညာ ဒေသများနှင့် ရခိုင်ပြည်နယ်တို့မှ အများဆုံး ဖြစ်ကြောင်း သိရသည်။

နယ်စပ်မှ တဘက်နိုင်ငံသို့ သွားရောက် အလုပ်လုပ်မည့် သူများသည် ဒေသရင်း၌ အလုပ်အကိုင် ရှားပါးနေခြင်းကြောင့် ပိုင်ဆိုင်သော ပစ္စည်းများကို ထုခွဲရောင်းချ၍ သွားနေကြခြင်းဖြစ်သည်။

လူကုန်ကူးသည့် ကိစ္စများ တွင်ကျယ်လာခြင်းကြောင့် အစိုးရ တာဝန်ရှိသူများက နယ်စပ်ဒေသ သွားရောက်မည့် သူများအား စစ်ဆေးရေးဂိတ် အများအပြားတွင် စစ်ဆေးမေးမြန်းခြင်း၊ သွားမည့်အကြောင်းအရာ မခိုင်လုံသူများအား သက်ဆိုင်ရာ ဒေသသို့ ပြန်လည် ပို့ဆောင်ခြင်းတို့ကြောင့် ပွဲစားများဖြင့် သွားလာ နေကြရခြင်းဖြစ်ကြောင်း သိရသည်။

“အဖမ်းအဆီးမရှိဘဲ ကော့သောင်းရောက်ချင်ရင် ပွဲစားခ ကျပ် ၃ သိန်းခွဲပေးရတယ်။ မှတ်ပုံတင်ကတ် နည်းနည်းလေး ဟောင်းနေရင် ၄ သိန်း တောင်းတယ်။ သွားမယ့်လူက အနည်းဆုံး ၃ ယောက် ရှိရမယ်လို့ ပွဲစားတွေက ပြောတယ်” ဟု ကော့သောင်း ဒေသသို့ သွားရောက်ရန် ရခိုင်ပြည်နယ် ကျောက်ဖြူမြို့မှ ရန်ကုန်မြို့သို့ ရောက်ရှိနေသူ ကိုသန်းရွှေက ဧရာဝတီကို ပြောသည်။

ရန်ကုန်မှ ကော့သောင်းအရောက် ပွဲစားခ ပေးဆောင်ရသော ငွေသည် ပြီးခဲ့သည့် ၂၀၁၀ ပြည့်နှစ်တွင် ကျပ် ၁ သိန်းခွဲနှင့် ၂ သိန်း ခန့်သာ ဈေးပေါက်ခဲ့ပြီး ယခုနှစ်တွင် ကော့သောင်းဒေသသို့ သွားရောက်သူ များပြားလာ၍ လူပွဲစားဈေးကွက် တွင်ကျယ်လာရာ ယခုကဲ့သို့ ဈေးနှုန်းမြင့်တက် သွားခြင်း ဖြစ်သည်ဟု ရန်ကုန်ဒေသခံများက ဆိုသည်။

“အောင်မင်္ဂလာ ကားဝန်းထဲက ကော့သောင်းသွားမယ့် ကားဂိတ်ရောက်တာနဲ့ ပွဲစားတွေက စုပြုံရောက်လာပြီး သူလုပ် ပေးမယ်၊ ငါလုပ်ပေးမယ်၊ ဈေးမများစေရဘူး ဆိုပြီး အတင်းစည်းရုံးတယ်” ဟု ကော့သောင်းသို့ သွားမည့် ကိုသန်းရွှေက ဆိုသည်။

လူပွဲစားများသည် ရန်ကုန်မြို့ ပါရမီ အဝေးပြေးကားဂိတ်နှင့် အောင်မင်္ဂလာ အဝေးပြေးကားဂိတ်တို့မှ တနင်္သာရီတိုင်းသို့ ပြေးဆွဲ နေကြသော ယာဉ်မောင်းများ၊ တနင်္သာရီ တိုင်းအတွင်းရှိ စစ်ဆေးရေး ဂိတ်များမှ တာဝန်ရှိသူများနှင့် ပူးပေါင်း ညှိနှိုင်းကာ ပို့ဆောင်ပေးနေကြောင်း သိရသည်။

ရန်ကုန် ဆူးလေ၊ ပန်းဆိုးတန်းတို့ရှိ ကုမ္ပဏီ တချို့သည် ကော့သောင်းမြို့၌ အခြေစိုက်ကာ လူတဦးလျှင် ထိုင်းဘတ်ငွေ ၁၆၀၀၀ (ကျပ် ၄၆၀၀၀၀ ခန့်) ယူဆောင်ကာ ကော့သောင်းအရောက် ပို့ဆောင်ပေး၍ နယ်စပ်နှင့် ထိုင်းနိုင်ငံအတွင်း အလုပ်အကိုင် ရရှိရေးကိုပါ ဆောင်ရွက်ပေးနေကြောင်း ကော့သောင်းမြို့ခံတဦးဖြစ်သူ ကိုကျော်ဝင်းက ပြောသည်။

ဆက်လက်၍ ၎င်းက “ဘတ် ၁၆၀၀၀ ပေးရင် ထိုင်းနိုင်ငံမှာ နေထိုင်ခွင့်လက်မှတ် လုပ်ပေးတယ်၊ အလုပ်ပါရှာပေးတယ်။ ပိုက်ဆံအကြေ မပေးနိုင်တဲ့ လူဆိုရင် လခထဲက ဖြတ်ယူတယ်။ ရန်ကုန်က အေးဂျင့်တချို့ ဒီမှာရုံးခန်းဖွင့်ပြီး လုပ်ပေး နေတယ်” ဟုဆိုသည်။

ရန်ကုန်မှ ကော့သောင်းသို့သွားရာ လမ်းကြောင်းတလျှောက်၌ စစ်ဆေးရေး ဂိတ်အများအပြား ရှိသော်လည်း ရေးမြို့နယ်နှင့် ထားဝယ်ကြားရှိ မလွဲတောင် စစ်ဆေးရေး ဂိတ်သည် အဓိက ကျသော ဂိတ်တခု ဖြစ်ကြောင်း၊ ခရီးသည် အနေဖြင့် မိမိသွားမည့် နေရာအား သေချာစွာ မပြောပြနိုင်ပါက ထိုဂိတ်မှတဆင့် မိမိနေရပ်သို့ ပြန်လည်ပို့ဆောင်ကြောင်း ကော့သောင်း ဒေသခံ တချို့ကဆိုသည်။

ရခိုင်၊ မွန်ပြည်နယ်နှင့် အညာဘက်မှ လာသူများ၏ မှတ်ပုံတင်များကို အဓိက စစ်ဆေးကြောင်း၊ ငွေ မပေးနိုင်သူများကို ဂိတ်မှ ဖြတ်သွားခွင့် မပေးကြောင်း၊ တခါတရံ ထားဝယ်မှ ကော့သောင်း သွားသည်ကိုပင် စစ်ဆေးပြီး ငွေတောင်းခံခြင်းများ ရှိကြောင်း ကိုကျော်ဝင်းက ရှင်းပြသည်။

“ပွဲစားတွေက ကားမောင်းသူတွေနဲ့ ညှိပြီး တင်တယ်။ ကားမောင်းသူတွေက သက်ဆိုင်ရာ ဂိတ်တွေရဲ့ တာဝန်ရှိသူတွေနဲ့ နားလည်မှုယူပြီး စစ်ဆေးမခံရ အောင်လုပ်ပေး ထားတယ်။ ဆရာရေ ကျနော့်ကားပေါ်မှာတော့ လူဘယ်နှဦး ပါတယ်လို့ အသိပေးလိုက်တာနဲ့ အဲဒီကားပေါ်ပါတဲ့ လူတွေကို ဘာမှတ်ပုံတင်မှ မစစ်ဆေးတော့ဘူး” ဟု ထားဝယ်-ကော့သောင်း ပြေးဆွဲနေသော အမြန်ယာဉ်လိုင်း ပိုင်ရှင်တဦးက ပြောသည်။

မြန်မာနိုင်ငံမှ လာရောက်သူ အများစုသည် အအေးခန်း၊ ငါးဖမ်းလှေ စသည့် ရေလုပ်ငန်းများ၊ စက်ရုံ၊ အလုပ်ရုံနှင့် စားသောက်ဆိုင် များတို့၌ လုပ်ကိုင်ကြပြီး ၎င်းတို့၏ အနိမ့်ဆုံးလစာမှာ ထိုင်းဘတ် ၆၅၀၀ (ကျပ် ၂ သိန်းဝန်းကျင်) မှ ဘတ်ငွေ ၁၀၀၀၀ (ကျပ် ၃ သိန်းဝန်းကျင်) ရရှိကြကြောင်း သိရသည်။ မြန်မာနိုင်ငံ၌ သာမန်လူတဦး၏ ဝင်ငွေ လစာမှာ ကျပ် ၇ သောင်း ၀န်းကျင်ရှိသည်။

ကော့သောင်း နယ်စပ်မှ ထိုင်းနိုင်ငံနှင့် မလေးရှားနိုင်ငံများသို့ အလုပ်လုပ်ကိုင်ရန် သွားသော လူဦးရေသည် လစဉ်ထောင်ချီ၍ ရှိပြီး အများစုမှာ မိန်းကလေးများ ဖြစ်သည်ဟု ကော့သောင်းမှ ထိုင်းနိုင်ငံ ရနောင်းဘက်သို့ ခရီးသည်များ ပို့ဆောင် ပေးနေသည့် လှေမောင်းသူ ကိုသန့်ဇင်က ဧရာဝတီကို ပြောသည်။

“လူ ၁၀၀ မှာ မိန်းကလေးက ၇၀ လောက်ရှိတယ်။ အများစုက ရန်ကုန်၊ မော်လမြိုင်နဲ့ အညာဘက်ကပါ။ မိန်းကလေးတွေ အများစုက ပြည့်တန်ဆာလုပ်ငန်းတွေ အတွက် ရောင်းစား ခံကြရတယ်၊ တချို့က စက်ရုံတွေမှာလုပ်ကြတယ်” ဟု ၎င်းက ဆိုသည်။

မိန်ကလေး အများစုသည် ထိုင်းနိုင်ငံအတွင်းရှိ ပြည့်တန်ဆာ လုပ်ငန်းများအတွက် လူပွဲစားများ၏ ရောင်းစားခြင်းကို ခံနေကြရပြီး ယခုနှစ်ပိုင်းအတွင်း အမျိုးသားများသည်ပင် ထိုင်း ရေလုပ်ငန်းများအတွက် ရောင်းစားခြင်းကို ခံနေကြရကြောင်း ကြားသိရသည်။

ထိုင်းနိုင်ငံ၊ ရနောင်းဒေသ၌ လိင်ဖျော်ဖြေရေးအလုပ် လုပ်ကိုင်နေသော မသီတာသည် လွန်ခဲ့သော ၁၀ နှစ်ခန့် ၎င်း၏ အသက် ၁၅ က ရန်ကုန် အင်းစိန်မြို့နယ်မှနေ၍ ကော့သောင်းဘက်သို့ ရောင်းစားခြင်း ခံခဲ့ရကြောင်း ပြောပြသည်။

“ကျမကို ပွဲစားက ကော့သောင်းက စားသောက်ဆိုင်မှာ အလုပ်သွင်းပေးမယ်ဆိုပြီး ခေါ်လာတယ်။ ကော့သောင်း ရောက်တော့ ရနောင်းဘက်ကို ခေါ်သွားပြီး အခန်းတခုထဲမှာ ၂ ရက် ပိတ်လှောင်ထားတယ်။ နောက်တနေ့မှာ အခန်းထဲကို အမျိုးသား တယောက် သွင်းပေးလိုက်ပြီး ပြည့်တန်ဆာ လုပ်ခိုင်းတော့တာပဲ” ဟု မသီတာက ရှင်းပြသည်။

ခင်ဦးသာ

ဧရာဝတီ

Posted in: ၀၃။ မြန်မာ့ သတင်း