အာဆီယံ လွပ်လပ်သောကုန်သွယ်မှုဒေသ(AFTA) ထူထောင်ရေးသဘောတူညီချက်အရ အာဆီယံနိုင်ငံများမှ မြန်မာနိုင်ငံသို့ သွင်း ကုန်ပစ္စည်း အမျိုးအစားပေါင်း ၇၅၀၀ ကျော် အကောက်ခွန် ကင်းလွတ်ခွင့်ပြုမည်ဖြစ်ကြောင်း သတင်း ရရှိသည်။
AFTA ထူထောင်ရေးအတွက် ၂၀၁၂ ခုနှစ်တွင် အာဆီယံနိုင်ငံများမှ မြန်မာနိုင်ငံသို့တင်သွင်းသည့် ကုန်ပစ္စည်းများ၏ ၈၀ ရာခိုင်နှုန်း အား အခွန်မကောက်ရန် သတ်မှတ်ထားရာ အခွန်ကင်းလွတ်ခွင့်ပြုမည့် ပစ္စည်းအမျိုးအစားများကို အာဆီယံအတွင်းရေးမှူးချုပ် ရုံး သို့ တင်ပြထားကြောင်း ဘဏ္ဍာရေးနှင့် အခွန်ဝန်ကြီးဌာန အကောက်ခွန် ကာကွယ်ရေးဌာနခွဲ ညွှန်ကြားရေးမှူး ဦးကျော်ဝင်းက ပြော သည်။
“အာဆီယံနိုင်ငံတွေက သွင်းကုန် ၈၀ ရာခိုင်နှုန်းကို အကောက်ခွန် သုည ရာခိုင်နှုန်းလျှော့ချဖို့ အာဆီယံ အတွင်းရေးမှူးချုပ်ရုံးကို ပေး ပို့ထားပါတယ်။ အဲဒီမှာ ဆွေးနွေးပြီးတဲ့အခါ ၀န်ကြီးကနေတဆင့် အစိုးရအဖွဲ့ဆီ တင်ပါမယ်။ အစိုးရအဖွဲ့က သဘောတူတာနဲ့ အမိန့်ထုတ်ပြန်ပါမယ်”ဟု ရန်ကုန်မြို့ ချက်ထရီယမ် ဟိုတယ်၌ ယမန်နေ့က ကျင်းပသည့် အာဆီယံ စီးပွားရေး အသိုက်အ၀န်း အလုပ်ရုံ ဆွေးနွေးပွဲတွင် ဦးကျော်ဝင်းက ပြောဆိုသည်။
သတင်း၊ ဆက်သွယ်ရေးနှင့် နည်းပညာပစ္စည်းများ အပါအ၀င် ၂၀၁၂ ခုနှစ်အတွက် အာဆီယံဒေသမှ တင်သွင်းသည့် ပစ္စည်းအမျိုးအစားပေါင်း ၉၅၅၈ မျိုးရှိနေပြီး ၎င်းတို့အနက်မှ ၈၀ ရာခိုင်နှုန်းဖြစ်သည့် ကုန်ပစ္စည်းအမျိုးအစားပေါင်း အနည်းဆုံး ၇၅၀၀ ကျော်မှာ အခွန်ကင်းလွတ်ခွင့် ပေးရမည်ဖြစ်သည်။
AFTA ထူထောင်ရေး သဘောတူညီချက်ကို မြန်မာနိုင်ငံက ၁၉၉၇ ခုနှစ်က လက်မှတ်ထိုးခဲ့ခြင်းဖြစ်ပြီး ၂၀၀၈ ခုနှစ်က စတင်ကာ အာဆီယံဒေသမှ သွင်းကုန် ၆၀ ရာခိုင်နှုန်းရှိ ပစ္စည်းအမျိုးပေါင်း ၄၉၄၂ မျိုးကို အခွန်ကင်းလွတ်ခွင့် ပေးခဲ့သည်။
AFTA သတ်မှတ်ချက်အရ မြန်မာ၊ လာအို၊ ဗီယက်နမ်နှင့် ကမ္ဘောဒီးယား နိုင်ငံများမှာ အာဆီယံနိုင်ငံများမှ သွင်းကုန်များအား ၂၀၀၈ ခုနှစ်တွင် ၆၀ ရာခိုင်နှုန်း၊ ၂၀၁၂ တွင် ၈၀ ရာခိုင်နှုန်း၊ ၂၀၁၅ တွင် ၉၃ ရာခိုင်နှုန်းနှင့် ၂၀၁၈ တွင် ၁၀၀ ရာခိုင်နှုန်း အခွန် ကင်းလွတ်ခွင့် ပေးရမည် ဖြစ်သည်။
“ကျနော်တို့ ၄ နိုင်ငံစလုံးကတော့ အခွန်ကင်းလွတ်ခွင့်ကို ၈၀ ပဲ ပေးမယ်လို့ တင်းခံနေကြတာဗျ။ မရရင်တော့ ၁၀၀ ရာခိုင်နှုန်း ပေး ရမှာပေါ့။ ပေးရင်တော့လည်း လုပ်ငန်းရှင်တွေအတွက် ပိုကောင်းမယ့် အနေအထား၊ ပိုပြီးယှဉ်ပြိုင်မှုတွေ များလာမယ့် အနေအထား ဖြစ်လာမှာပါ”ဟု အကောက်ခွန်ဌာန ညွှန်ကြားရေးမှူး ဦးကျော်ဝင်းက ပြောသည်။
ဈေးကွက်ပြိုင်ဆိုင်မှု ပိုများလာမည်ကို အကောက်ခွန် ညွှန်မှူးက အကောင်းဘက်က ရှုမြင်နေသော်လည်း ပြည်တွင်း လုပ်ငန်းရှင် အများစုက AFTA ကြောင့် အခွန်မပေးရဘဲ ဈေးနှုန်းသက်သာလာမည့် အာဆီယံကုန်ပစ္စည်းများနှင့် မယှဉ်ပြိုင်နိုင်မည်ကို စိုးရိမ်နေကြ ကြောင်း ပြောဆိုကြသည်။
Ref: ဧရာဝတီ
0 comments:
Post a Comment