10:32
Unknown
ဘန်ကောက်အထက်က အယုဒ္ဓယခရိုင်မှာ မြန်မာရေဘေးဒုက္ခသည်တွေကို မြန်မာအသိုင်းအ၀ိုင်းက ၀ိုင်းဝန်းကူညီ ထောက်ပံ့နေပါတယ်။ အယုဒ္ဓယခရိုင်မှာ မြန်မာရေဘေးဒုက္ခသည်တွေကို ဘန်ကောက်က မြန်မာတွေ၊ ပထုံဌာနီ ၀ပ်သလုံးဘုန်းကြီးကျောင်းက သံဃာတော်တွေနှင့် အေပက်တက္ကသိုလ် မြန်မာကျောင်းသားတွေက အစားအစာ သောက်ရေ လာရောက် ထောက်ပံ့နေတယ်လို့ အယုဒ္ဓက အလုပ်ရုံ အလုပ်သမား ကိုတင်အောင်ထွန်းက ပြောပါတယ်။
“မနေ့ကစပြီးတော့ ခရိုင်သံဃာတွေဦးစီးပြီးတော့ မားမားထုပ်၊ အချိူရည်၊ ရေသန့်ဗူး ကော်ဖီထုပ် ဓာတ်ဆားထုပ်တွေ သူတို့ဝေပေးတယ်၊ ဒီနေ့ တစ်ဖွဲ့လာတယ်၊ ကျောင်းသားတွေပေါ့။ ထင်မင်းနဲ့ ကြက်သားနဲ့ ချက်ထားတာကို သူတို့ဝေပေးတယ်။”
ဘန်ကောက်မြို့ ဘန့်ဘော်ရပ်ကွက်ဇုန်က မြန်မာတွေကလည်း လှူဒါန်းလာတဲ့ အစားအသောက်တွေကို ၀ိုင်းဝန်းစုဆောင်းပြီး အယုဒ္ဓယနှင့် ပထုံဌာနီက မြန်မာရေဘေးဒုက္ခသည်တွေဆီ သွားရောက်ပို့ဆောင်ပေးနေပါ တယ်။
မြန်မာရေဘေးဒုက္ခသည်တွေရဲ့ အခြေအနေနှင့် ရင်ဆိုင်နေရတဲ့ပြဿနာကို ကူညီပေးနေတဲ့ ကိုနေလင်းအောင်က အခုလိုပြောပါတယ်။
“ဘယ်လောက်အထိ ဒုက္ခရောက်နေလဲဆိုတော့ ရေကြီးနေလို့ အပြင်ထွက်တဲ့အခါ လမ်းတစ်ဝက်မှာ ပလိပ်တွေနှင့်တွေ့ရင် ပြဿနာတက်တယ်။ ဒဏ်ငွေ အရိုက်ခံရတာတွေဖြစ်တယ်။ ဒီသတင်းတွေကြားတော့ ဘယ်မှလဲမသွားရဲဘဲ၊ မသွား မလာရဲ ဖြစ်နေကြတယ်။ အယုဒ္ဓယစက်ရုံမှာ အလုပ်လုပ်နေကြတဲ့ မြန်မာတွေကတော့ ၅ သောင်းအထက်မှာရှိတယ်။ ဒုက္ခရောက်လို့ သူတို့ဖုန်းနံပတ်တွေ အဆက်အသွယ်ရထားတဲ့ ၁ သောင်းကျော်လောက်တော့ ကျနော့်စာရင်းမှာရှိတယ်။”
ရေဘေးဒုက္ခသည်တွေကို ထိုင်းအစိုးအရက အကူအညီပေးရာမှာ မသမာမှုတွေ မဖြစ်ပွားစေရန်နှင့် အပိုအလိုမရှိအောင် ဆောင်ရွက်နိုင်ရန် အိမ်ထောင်စု မှတ်ပုံတင်စာရင်းတွေအရ ရပ်ကွက်အလိုက် ပေးနေခြင်း၊ ပုဂ္ဂလိက ပရဟိတ အဖွဲ့အစည်းတွေရဲ့ အကူအညီကို ရယူဖို့လည်း ထိုင်းစကား ကောင်းမွန်စွာ မပြောနိုင်ခြင်းတို့ကြောင့် မြန်မာဒုက္ခသည်တစ်ချို့ အကူအညီမရရှိသေးပါ။ ထိုင်းအစိုးရက ရေဘေးကြောင့် လူ ၃၁၇ ဦးသေဆုံးပြီး ၉ သန်းခန့် ရေဘေးဒုက္ခခံနေရကြောင်း အောက်တိုဘာလ ၁၉ ရက်က ထုတ်ပြန်ပေးထားပါတယ်။ ဘန်ကောက်နှင့် နယ်နိမိတ် တစ်ဆက်တည်း ပထုံဌာနီက ရေတား သဲအိတ်တမန်အချို့ပြိုကျတာကြောင့် အရေးပေါ်ကယ်ဆယ်ရေး စင်တာရှိရာ ဒွန်မောင်းနှင့် ရန်စစ်ရပ်ကွက်ဇုန်တွေကို ရေစတင်ဝင်ရောက်နေပြီး ဘန်ကောက်မြို့တော်အတွင်းကို ကာကွယ်ထားတဲ့ ရေတား အုတ်တမံအချို့ အပိုင်းတွေကို ရေစတင်တိုက်စားနေပါတယ်။
Source: DVB
Posted in: ၀၄။ ထိုင်းသတင်း
0 comments:
Post a Comment