15:48
Unknown
၂၀၁၂ ဧပြီ ၁ ရက်နေ့တွင် ကျင်းပမယ့် ကြားဖြတ် ရွေးကောက်ပွဲ ကျင်းပရန် အချိန် ပိုပြီး နီးကပ်လာလေလေ၊ အမျိုးသား ဒီမိုကရေစီ အဖွဲ့ချုပ်အတွက် အနှောက်အယှက်တွေ ပိုများလာ လေလေ ဆိုရလောက်အောင် မြန်မာ့နိုင်ငံရေး အခင်းအကျင်းရဲ့ ပကတိ အနေအထားဟာ ပိုမို ရှုပ်ထွေးလာနေတာကို တွေ့ရပါတယ်။ မြန်မာ ရွေးကောက်ပွဲ ကော်မရှင်က မဲပေးနိုင်သူ စာရင်းများ ကြေညာစဉ်ကတည်းက မှတ်ပုံတင်တခုထဲနဲ့ လူပေါင်းများစွာ ဖြစ်နေတာ၊ ကွယ်လွန်ပြီးသား လူပုဂ္ဂိုလ်များရဲ့ အမည်စာရင်းတွေ မဲစာရင်းထဲ ပါဝင်နေတာ၊ မဲပေးဖို့ အသက်ပြည့်ပြီးသော်လည်း မဲစာရင်းထဲ မပါဝင်တာ၊ အမှန်တကယ် နေထိုင်သူ မဟုတ်တာတွေ၊ အသက်မပြည့်သေးသူတွေ မဲစာရင်းထဲတွင် ပါဝင်နေတာတွေ တွေ့ကြုံခဲ့ရပါတယ်။ အခု ရွေးချယ် တင်မြှောက်မယ့် မဲဆန္ဒနယ် ၄၈ မြို့နယ်က မဲပေးမယ့်သူစာရင်းဟာ ၂၀၁၀ ရွေးကောက်ပွဲ ကျင်းပစဉ်က မဲစာရင်းအတိုင်း ဖြစ်တယ်လို့ ပြောနေကြတဲ့အတွက် ၂၀၁၀ ရွေးကောက်ပွဲဟာ မဲလိမ်မှု၊ မသမာမှုတွေနဲ့ ကျင်းပခဲ့တယ်ဆိုတာကို အများသိအောင် ရွေးကောက်ပွဲ ကော်မရှင်က တမင်တာပဲ ဒီ စာရင်းကို ထုတ်ပြန်တာလား၊ ဒါမှမဟုတ် ဘယ်လို စာရင်းမှားတွေ ဖြစ်နေတာလဲဆိုတာက အတော့်ကို မတွေးတတ်အောင် ဖြစ်နေပါတယ်။ မဲစာရင်းထဲက မှားယွင်းမှုတွေကို သက်ဆိုင်ရာ ရွေးကောက်ပွဲ ကော်မရှင်တွေက ဖြေရှင်းပေးခဲ့တယ်ဆိုတဲ့ သတင်းများ ကြားသိခဲ့ရသော်လည်း ရွေးကောက်ပွဲ ကျင်းပဖို့ ဆယ်ရက်ခန့် ကြာတဲ့အချိန်အထိ မဲစာရင်းကိစ္စ ပြေလည်အောင် မဖြေရှင်းနိုင်သေးတာကလည်း စိတ်ဝင်စားစရာ ဖြစ်နေပါတယ်။
ရွေးကောက်ပွဲ ကျင်းပမယ့် မဲဆန္ဒနယ်များတွင် ရွေးကောက်ပွဲ ဥပဒေနဲ့ ညိစွန်းနေတဲ့ အဖြစ်အပျက်များစွာ ဖြစ်ပွားနေကြောင်း သတင်းမျိုးစုံ ပေါ်ပေါက်နေပြီး အမျိုးသား ဒီမိုကရေစီ အဖွဲ့ချုပ်ကလည်း ထိုကိစ္စများနဲ့ ပတ်သက်လို့ ဆက်လက် တင်ပြ ပြောဆိုနေဆဲ ဖြစ်ပါတယ်။ ရွေးကောက်ပွဲ ၀င်ရောက် ယှဉ်ပြိုင်တဲ့ ကြံ့ခိုင်ဖွံ့ဖြိုးရေးပါတီ ကိုယ်စားလှယ်လောင်းက ပြိုင်ဘက် အမျိုးသား ဒီမိုကရေစီ အဖွဲ့ချုပ်ကို ပုတ်ခတ် ပြောဆိုတဲ့ကိစ္စ၊ ကြပ်ပြေးနေပြည်တော် မဲဆန္ဒနယ်တွင် ၀င်ရောက် ယှဉ်ပြိုင်မယ့် အမျိုးသား ဒီမိုကရေစီ အဖွဲ့ချုပ် ကိုယ်စားလှယ်လောင်းရဲ့ ဟောပြောပွဲ တိုက်ခိုက်ခံရတဲ့ကိစ္စ၊ သက်ဆိုင်ရာ အစိုးရ၀န်ထမ်းများက လက်အောက်ခံ ၀န်ထမ်းများကို ရွေးကောက်ပွဲ ဥပဒေနဲ့ မလျှော်ညီဘဲ ကြိုတင်မဲ ကောက်ခံနေတဲ့ ကိစ္စတွေဟာ လတ်တလော ဖြစ်ပျက်နေတဲ့ ကိစ္စတွေ ဖြစ်ပါတယ်။ ဖြစ်ပျက်နေတဲ့ ပြဿနာတွေကလည်း အမျိုးသား ဒီမိုကရေစီ အဖွဲ့ချုပ် ကိုယ်စားလှယ်လောင်းများကို ပစ်မှတ်ထား တိုက်ခိုက်နေတဲ့ကိစ္စများသာ ဖြစ်နေလေတော့ လက်ရှိ ပကတိမြေပြင် အခြေအနေတွေဟာ လက်ရှိ အစိုးရတာဝန်ရှိသူများရဲ့ ရွေးကောက်ပွဲဆိုင်ရာ ဂတိက၀တ်တွေနဲ့ မကိုက်ညီသလို ဖြစ်နေပါတယ်။
အမျိုးသား ဒီမိုကရေစီ အဖွဲ့ချုပ်အနေနဲ့ လက်ရှိ အခက်အခဲကြားထဲက ဖောက်ထွက်နိုင်တဲ့ လမ်းစအနည်းငယ် မြင်နေရသော်လည်း အချို့ အဖြစ်အပျက်များကိုတော့ ခက်ခက်ခဲခဲ ရှင်းလင်း ကျော်ဖြတ်ရကောင်း ကျော်ဖြတ်ရပါလိမ့်မယ်။ ပကတိအနေအထားမှာ ရွေးကောက်ပွဲနဲ့ ပတ်သက်တဲ့ ညစ်ပတ်မှုတွေ ရှိနေတယ်ဆိုတာ သိသာ ထင်ရှားနေသော်လည်း ထို ညစ်ပတ်မှုများကို ဘယ်သူတွေက ဘယ်တရားဥပဒေနဲ့ ဖြေရှင်းကြမလဲဆိုတာ စဉ်းစားစရာ ပါ။
လက်ရှိ ဖြစ်ပျက်နေတဲ့ ရွေးကောက်ပွဲဆိုင်ရာ ပြဿနာများနဲ့ ပတ်သက်ပြီး မြန်မာအစိုးရနဲ့ ရွေးကောက်ပွဲ ကော်မရှင်မှာ တာဝန်ရှိသလား၊ မသမာမှုတွေ ကျူးလွန်နေသူတွေအပေါ်မှာပဲ တာဝန်ရှိတာလားဆိုတာကလည်း မသဲမကွဲ ဖြစ်နေတဲ့အတွက် လက်ရှိ အာဏာပိုင်တွေအနေနဲ့ ဒီမိုကရေစီ ပြောင်းလဲရေး လမ်းကြောင်းကို ဖြူဖြူစင်စင် သွားချင်တာလား၊ ညစ်တီးညစ်ပတ် သွားချင်တာလားဆိုတာ မေးခွန်းထုတ်စရာ ဖြစ်နေပါတယ်။ လက်ရှိ အခြေအနေနဲ့ ပတ်သက်ပြီး ရန်ကုန်မြို့ မျက်စေ့ကြီး၊ နားကြီး သတင်းရပ်ကွက်ကတော့ လွယ်တာကတော့ တော်တော့်ကို မလွယ်မကူ ဖြစ်နေဆဲပဲ လို့ သုံးသပ်ပြပါတယ်။
မြင့်လှိုင်
Ref: Burma Today
Posted in: ၀၈။ ဆောင်းပါး
0 comments:
Post a Comment