စင်ကာပူမှ ဆောက်လုပ်ရေးအလုပ်အကိုင်များနှင့် မြန်မာများ

မောင်သာမန်
ဇန်န၀ါရီ ၁၇၊ ၂၀၁၂

နိဒါန်း
နိုင်ငံတနိုင်ငံတည်ဆောက်လျှင်၊ ဆောက်လုပ်ရေးအားဖြင့် စတင်ရသည်။ ၁၂ ထပ်တိုက်တလုံးကို လပိုင်းအတွင်း ပြီးအောင်ဆောက် နိုင် သည်။ ကုန်တိုက်ကြီးတခု၊ ကွန်ဒိုမီနီယံ အထပ် ၄၀ တိုက်ကြီးလည်း တနှစ်အတွင်း ပြီးအောင်ဆောက်နိုင်သည်။ စက်မှု Industrial Building တစ်ခုကိုလည်း တနှစ်အတွင်းပြီးအောင်ဆောက်ပြီး ငှားစားနိုင်သည်။ Developer ဆိုသူများသည် အစိုးရထံမှ ဆောက်လုပ်ခွင့်ပါမစ်များကို ရယူပြီး၊ နိုင်ငံခြားအလုပ်သမား၊ အင်ဂျင်နီယာများဖြင့် တနှစ်အတွင်းတည်ဆောက်ပြီး ရောင်းချကာ၊ အမြတ်ငွေ သန်းနှင့်ချီရရှိသွားသည်။ အလုပ်သမား၊ ကန်ထရိုက်တာများလည်း ၀ိုင်းဝန်း ပါဝင်၊ လစာရ၊ ငွေရွှင်ကြသည်။
အဆောက်အဦး၊ ရှော့ပင်စင်တာများ၊ လူနေကွန်ဒိုများ ဆောက်လုပ်ရေးသည် မခက်ခဲလှပါ။ တစ်နှစ်အတွင်း ပြီးနိုင်သည်။ သို့သော် စက်ရုံ အလုပ်ရုံများဆောက်ရာတွင် အဆောက်အဦးမှာ တနှစ်ကျော်ကျော်ဆောက်ရသည်။ Infra-structure ရေ၊ မီး၊ အဲယားကွန်း၊ ဓာတု၊ ဓာတ်ငွေ့များ၊ ရေသန့်လုပ်ငန်းများလည်း ဆောက်ရသောကြောင့် ပိုမိုကြာသည်။ စက်ရုံအပြီးတွင် စက်များကို အထဲထည့်ပြီး၊ ကုန် ထုတ်လုပ်ရေးအတွက် စမ်းသပ်ရသည်။ ထို့ကြောင့် စက်ရုံဆောက်ပြီး၊ ကုန်ထုတ်လုပ်ငန်း စနိုင်သည်အထိ အနည်းဆုံး (၃) နှစ်ခန့် လိုအပ် သည်။
စက်ရုံထက် ပိုခက်သော ဆောက်လုပ်ရေးလုပ်ငန်းမှာ အဝေးပြေးလမ်းမကြီးများ၊ လေယာဉ်ကွင်းကြီးများ၊ မီးရထားလမ်းမကြီးများ စသည် တို့ကို မြေပေါ်၊မြေအောက် ဥမင်များ၊ တံတားကြီးများကိုလည်း ဆောက်ရသောကြောင့် ၁၀ နှစ်ခန့် အချိန်ပေးရပါသည်။ ဆင်းရဲသောနိုင်ငံ များတွင် ထိုသို့အဝေးပြေးလမ်းမဆောက်ရန် ငွေအားများစွာလိုအပ်ပါသည်။
ဆောက်လုပ်ရေးလုပ်ငန်းများတွင် အလုပ်သမား၊ အင်ဂျင်နီယာများ၊ မန်နေဂျာများအတွက် စင်ကာပူတွင် လစာအနည်းဆုံးဖြစ်သည်။ အ လုပ်သမားတစ်ဦး တစ်လ ဒေါ်လတစ်ထောာင်ခန့်ရပြီး၊ အင်ဂျင်နီယာတစ်ဦး လစာ ၂ ထောင်၊ မန်နေဂျာ လစာ ၄ ထောင်ခန့် ဈေးပေါက်ပါ သည်။
● စင်ကာပူဆောက်လုပ်ရေး ၂၀၀၈
ပြီးခဲ့သော ၂၀၀၈ ခုနှစ်က စီးပွားရေးကပ်ကြီးဖြစ်ချိန်တွင် စင်္ကာပူတကျွန်းလုံး၊ ဆောက်လုပ်ရေးလုပ်ငန်းများ ရပ်ဆိုင်းရသည်။ နိုင်ငံခြား အလုပ်သမားများ အလုပ်မရှိသောကြောင့် ပြည်တော်ပြန်ရသည့်အချိန်ကာလတွင်၊ အစိုးရက ဆောက်လုပ်ရေးလုပ်ငန်းကြီး (၂) ခုကို အ မြန်ဆုံးပြီးအောင် လုပ်ဆောင်စေသည်။ ထို (၂) ခုမှာ ….
၁။ ကာစီနိုဆောက်လုပ်ရေး (Marina Bay Sands – S$8 billions နှင့် Resorts World Sentosa S$6 billions) စုစုပေါင်း ဒေါ်လာ ၁၄ ဘီလျှံ ပရိုဂျက်။
၂။ ဆိုလာပင်နယ် Solar Panel – Semiconductor Manufacturing S$6 billion ပရိုဂျက်တို့ဖြစ်ကြသည်။
● ကာစီနို (၂) ခု ဆောက်လုပ်ရေး
ကာစီနိုမှာ နိုင်ငံတိုးတက်လာသည်နှင့်အမျှ အသုံးစရိတ်လည်းကြီးမားလာရာ၊ လောင်းကစားလုပ်ခွင့်ပေးခြင်းဖြင့် အခွန်ကောက်ပြီး၊ ဘတ် ဂျက်ဖြည့်တင်းရန်ဖြစ်သည်။ ထိုလုပ်ငန်းကို လေလံဆွဲရာတွင် အမေရိကန်၊ လာစ်ဗွီဂတ်ကုမ္ပဏီကြီးက Marina Bay Sands ကိုရရှိပြီး၊ မလေးရှားမှ ဂျန်တင်းဟိုက်လင်းကုမ္ပဏီကြီးက Resorts World Sentosa ကို လေလံဆွဲရရှိသွားသည်။ ဦးစားပေးအလုပ်မှာ လောင်း ကစားပွဲအမြန်စတင်ပြီး ၀င်ငွေမြန်မြန်ရရှိရေးဖြစ်သည်။
စင်ကာပူတွင် ကာစီနိုဆောက်လုပ်ရန် အခြေအနေဖြစ်လာပုံက ရယ်စရာကောင်းသည်။ တိုးတက်သောတိုင်းပြည်တွင် သုံးငွေက ပိုများ လာသောကြောင့် ၀င်ငွေပိုရရန် နည်းမျိုးစုံစဉ်းစားရသည်။ နောက်ဆုံးတွင် ရယ်စရာစကားအရ အသုံးစွဲကြီးသောအိမ်တခုတွင် ဖဲဒိုင်ခံပြီး အကောက်ကောက်ရသလို ဖြစ်သွားသည်။ ယခင်အစိုးရများက ကာစီနိုကို ကန့်ကွက်သော်လည်း၊ ယခုအခါ ကာစီနိုပရိုဂျက်ကို လွှတ် တော်တွင် မဲခွဲအနိုင်ရရန် ကြံဖန်ရသည်။ ဘာသာရေး၊ လူမှုရေးအသင်းဖွဲ့များက အပြင်းထန်ကန့်ကွက်သည်။ ပြည်သူများ လောင်းကစားပွဲ ကြောင့် မိသားစုပြဿနာ၊ ရာဇ၀တ်မှုများစွာပေါ်လာနိုင်သည်ဆိုကာ ယခင်ကဖွင့်ခွင့်မရပါ။ ယခုအခါ ပါလီမန်တွင် အချေတင်ပြောဆိုခွင့် ပေးလိုက်သည်။ ပါလီမန်နှင့် သတင်းစာလူထုအော်သံများတွင် ကာစီနိုမကောင်းကြောင်း များစွာရေးကြသည်။ ပါလီမန်တွင်လည်း မလုပ် သင့်ကြောင်း အကြောက်ကန်ဆွေးနွေးကြသည်။ နောက်ဆုံးတွင် စင်ကာပူလူမျိုးများ ကာစီနိုမသွားရေးအတွက် ၀င်ကြေး ဒေါ်လာ ၁၀၀ သတ်မှတ်မည်။ သာမန်ဆင်းရဲသားများ လာပြီး၊ ဖဲရှုံး၊ ဒုက္ခမရောက်စေရန် ၀င်ကြေးဈေးကြီးကြီး သတ်မှတ်ပေးမည်။ ကာစီနို ၂ ခုလုပ်မည်ဟု ကြေညာလိုက်သည်။ လူများစိုးရိမ်မှုအားလုံးနီးပါးကို အစိုးရကကြိုတင်ကာကွယ်နည်းများစွာလုပ်ပေးကာ ပြည်သူများ၊ ဘာသာရေး၊ လူမှု ရေးအဖွဲ့အစည်းများကို ချွေးသိပ်နိုင်ခဲ့သည်။ ၂ နှစ်အတွင်း ကာစီနို ၂ ခု အပြိုင်ဆောက်လုပ်ပြီးစီးကာ လောင်းကစားပွဲများကျင်းပပြီး ၀င်ငွေ ရရှိလာသည်။ ကာစီနိုနှင့်တပြိုင်တည်း အမျိုးသမီးကြိုက် ရှော့ပင်စင်တာများ၊ ကလေးကြိုက် ဝေါ့ဒစ်စနေ၊ ယူနီဗာဆယ်စတူဒီယိုပြခန်း စသည့် ကမ္ဘာကျော် Entertainment များစွာကို တဖြေးဖြေးဆောက်ယူရသည်။

အမေရိကန်၊ လာစ်ဗွီဂတ်ကုမ္ပဏီကြီး၏ Marina Bay Sands ကာစီနို

မလေးရှားမှ ဂျန်တင်းဟိုက်လင်းကုမ္ပဏီကြီး၏ Resorts World Sentosa ကာစီနို

● ဆိုလာဆဲ စက်ရုံ
အစိမ်းရောင်စွမ်းအင် Green Energy ခေတ်စားလာချိန် ဥရောပ၊ အမေရိကား အိမ်များသည် ဆိုလာပင်နယ်များအားဖြင့် ညမီးများထွန်းရန် ကြိုးစားလာသည်။ ထိုအချိန်တွင် နော်ဝေး (ကမ္ဘာ့အချမ်းသာဆုံးနိုင်ငံ) မှ REC ဆိုသောကုမ္ပဏီသည် ဆိုလာစက်ရုံကို စင်ကာပူတွင် တည် ထောင်ရန်၊ နော်ဝေပြည်သူလူထုထံမှ ရှယ်ရာရောင်းပေးသည်။ ရောင်းရငွေ US$ 6.2 billions ရရှိပြီး ပရိုဂျက်စတင်သည်။ စင်ကာပူတွင် ဆိုလာဆဲပင်နယ်များကို စီမီးကွန်ဒက်တာနည်းလမ်းဖြင့် စက်ရုံတည်ထောင်ပြီး၊ စင်ကာပူတွင် အစအဆုံး ထုတ်လုပ်မည့်ပရိုဂျက်ဖြစ်သည်။
နော်ဝေးနိုင်ငံသည် ကမ္ဘာ့အချမ်းသာဆုံးနိုင်ငံဖြစ်သည်။ နိုင်ငံကြွယ်ဝခြင်းတွင် Human Resources & Natural Resources နှစ်မျိုးစလုံးလို သည်။ စင်ကာပူ၊ ဟောင်ကောင်း၊ ဆွဒ်ဇာလန်တို့ကဲ့သို့ Human Resources တစ်ခုတည်းနှင့် ချမ်းသာသောနိုင်ငံများမှာ ချွင်းချက်ဖြစ် သည်။ နော်ဝေးနိုင်ငံသည် ရှေးယခင်ကတည်းက အေးချမ်းစွာနေထိုင်သော စကင်ဒေနီးဗီးယန်းနိုင်ငံဖြစ်သည်။ နော်ဝေးနိုင်ငံ အော်စလိုမြို့မှ ကမ္ဘာ့ငြိမ်းချမ်းရေးနိုဘယ်လ်ဆုကိုပေးသည်။ မူလကတည်းက စစ်စရိတ်မသုံးပဲ၊ ကြားနေနိုင်ငံဖြစ်သောကြောင့် ကြွယ်ဝအေးချမ်းသည့် နိုင်ငံသည် ၁၉၆၀ နောက်ပိုင်းတွင် ကမ်းလွန်ရေနံထွက်ပြီး တစ်နှစ်လျှင် ရေနံ၊ ဓာတ်ငွေ့ရောင်းချငွေ US $ 200 billions ရရှိလာသည်။ လူဦးရေ (၆) သန်းမျှရှိသောနိုင်ငံကလေးသည် ကမ္ဘာ့အကြွယ်ဝဆုံးနိုင်ငံဖြစ်နေသည်။ ပြည်သူများထံမှ အစိုးရထောက်ခံချက်ဖြင့် REC ကုမ္ပဏီမှ အစုရှယ်ယာတောင်းခံသောအခါ၊ မိမိတို့စုဆောင်းငွေများကို ထိုကုမ္ပဏီတွင် ရင်းနှီးမြှုပ်နှံကြသည်။ Solar Cell business semiconductor factory ကို စင်ကာပူတွင်တည်ဆောက်ရန် ငွေအရင်းနှီးရရှိခဲ့သည်။

ထိုလုပ်ငန်းသည် အမြတ်ထွက်ဖို့မလွယ်ကြောင်းသိသိနှင့် နော်ဝေးနှင့်စင်္ကာပူ နှစ်နိုင်ငံပေါင်းပြီး REC ပရိုဂျက်ကို အကောင်အထည်ဖော် ခဲ့သည်။ နော်ဝေးနိုင်ငံသားများ အိမ်တိုင်း သူတို့အိမ်အမိုးတွင် Solar Panel ဆိုလာပင်နယ်များတပ်ဆင်ထားပါက ဒေါ်လာ ၅၀၀၀ မျှသာ ကုန်ကျမည်။ သူတို့အတွက် ထိုငွေပမာဏမှမပြောပလောက်ပါ။ ညအချိန်တွင် ဆိုလာပင်နယ်မှ လျှပ်စစ်ဓါတ်အားဖြင့် မီးတိုင်များ လင်းနေ ပါက နော်ဝေးအိမ်ရှင်များစိတ်ပျော်ကြမည်။ အနှစ် ၃၀ ခံအောင် ဆိုလာပင်နယ်ကို စီမံပြုလုပ်ထားသည်။ တရုပ်လုပ် ဈေးသက်သာသော ဆိုလာပင်နယ်များ ဥရောပသို့မရောက်လာရေးအတွက်လည်း Certificate, Class Approval များဖြင့် ကာကွယ်ထားမည်ဖြစ်သောကြောင့် သေချာပေါက် အမြတ်ရမည်ထင်ရသည်။ စင်ကာပူသည် အနှစ် ၄၀ အတွင် စီးပွားရေး၊ ပွဲစားလုပ်ငန်းဖြင့် ချမ်းသာကြွယ်ဝလာခြင်းကိုလည်း နော်ဝေးနိုင်ငံသားများက အထင်ကြီးကြသည်။ ထို့ကြောင့် Investment S$ 6 billions မှာ REC အတွက် သိပ်မခဲယဉ်းလှပါ။ စင်ကာပူ ကလည်း သူ့နိုင်ငံတွင် ရင်းနှီးမြှုပ်နှံအောင် Investors များကို လိုက်လံချဉ်းကပ်ရသည်။ REC ပရိုဂျက် (၃) နှစ်အတွက် အလုပ်သမား တသောင်းကျော်အလုပ်ရပြီး၊ စင်ကာပူလုပ်သော ဆိုလာပင်နယ်များကို နိုင်ငံခြားထုတ်ရောင်းချခြင်းဖြင့် ကမ္ဘာ့ပထမဆုံး၊ အကြီးဆုံး အမြတ်အစွန်းရသော ဆိုလာပင်နယ်စက်ရုံအဖြစ် နာမည်ကျော်မည် မျှော်မှန်းခဲ့ပါသည်။ သို့သော် မှန်းချက်၊ နှမ်းထွက်မကိုက်လှပါ။ တကယ်တော့ ဈေးချိုသော တရုတ်နိုင်ငံထုတ်ဆိုလာပင်နယ်များကိုမပြိုင်နိုင်သောကြောင့် REC ကုမ္ပဏီသည် ၂၀၁၀ နောက်ပိုင်းတွင် အကြီးအကျယ်အရှုံးပေါ်လျှက်ရှိသည်။ ကမ္ဘာ့စွမ်းအင်လောကတွင် နေရောင်စွမ်းအား၊ ဆိုလာဆဲလ်ဖြင့် လျှပ်စစ်မီးထွန်းခြင်းကို မြန်မာပြည် တွင် ကြက်ဆူဆီဖြင့် စွမ်းအင်ထုတ်ရန်အတွက် ကြက်ဆူပင်စိုက်သကဲ့သို့ပင်ဖြစ်ပေသည်။
● စင်ကာပူအစိုးရ၏ နိုင်ငံခြားရင်းနှီးမြှုပ်နှံသူများကိုဆွဲဆောင်ခြင်း
Economic Development Board အီးဒီဘီ EDB ဆိုသောအဖွဲ့ရှိသည်။ ထိုအဖွဲ့သည် နိုင်ငံတကာကုမ္ပဏီကြီးများကို စင်ကာပူတွင် သူတို့ လုပ်ငန်းများဆောက်လုပ်ရန်၊ အကြီးအကျယ်ဆွဲဆောင်လျှက်ရှိသည်။ တရုတ်၊ အိန္ဒိယ၊ မလေးရှား၊ ထိုင်း၊ အင်ဒိုနီးရှားနိုင်ငံများက မော်တော်ကား၊ လေယာဉ်၊ အကြီးစားစက်မှုလုပ်ငန်းများ၊ လူသုံးကုန်ပစ္စည်းစက်ရုံများတွင် စင်ကာပူထက်သာလွန်ကြသည်။ စင်ကာပူက အီလက်ထရွန်းနစ်၊ အနုဇီဝသိပ္ပံ၊ ဆေးဝါး၊ ဆက်သွယ်ရေး၊ ရေနံဓာတုလုပ်ငန်းများစသည့် နည်းပညာအခြေခံလုပ်ငန်းများတွင် အားစိုက် သည်။ စီးပွားရေး၊ ငွေကြေးလုပ်ငန်းများတွင်လည်း အလေးပေးကာ၊ ကြိုးနီစနစ်နှင့် လာဘ်ပေးမှုနည်းပါးအောင်အစိုးရက ထိမ်းသိမ်းပေး သည်။ ဤသို့ဖြင့်၂၀၀၉ စာရင်းအရ စင်ကာပူသည် နိုင်ငံခြားရင်းနှီးမြှုပ်နှံ၊ ဆောက်လုပ်ရေးလုပ်ငန်းများတွင် ကမ္ဘာ့နံပါတ် (၁) တွင် ရပ်တည် နေဆဲဖြစ်သည်။ အောက်ပါဇယားများအားဖြင့် စင်ကာပူအစိုးရ၏ ကမ္ဘာ့နှင့်ယှဉ်ချက်များကို မြင်နိုင်ပေသည်။

● ဆောက်လုပ်ရေးလုပ်ငန်းသဘာဝ
၁။ အလုပ်ရှင် Clients, ကွန်ဆပ်တင့်၊ မိန်းကွန်း၊ ဆပ်ကွန်းများ
လုပ်ငန်းရှင်ကုမ္ပဏီတစ်ခု (သို့မဟုတ်) အစိုးရက ဆောက်လုပ်ရေးလုပ်ငန်းတစ်ခု ပရိုဂျက်စတင်လျှင် ပထမဆုံး Consultant ကုမ္ပဏီကို ငှားရပါသည်။ လုပ်ငန်းရှင်ကုမ္ပဏီနှင့် ကွန်ဆပ်တင့် နှစ်ဦးပေါင်းပြီး ပရိုဂျက်ဆွဲရသည်။ ထိုသို့ ဘီလျှံနှင့်ချီသော ဆောက်လုပ်ရေးလုပ်ငန်းများကို World Wide လုပ်ပေးနေသည့် ကုမ္ပဏီအကြီးများက ချဉ်းကပ်လာသည်။ သင့်တော်သော ကွန်ဆပ်တင့်ကိုရွေးချယ်ပြီးနောက်မှ Civil, Mechanical, Electrical အလုပ်များအတွက် နည်းပညာကုမ္ပဏီများကို ထပ်မံရွေးချယ်ရပါသည်။ ပထမကုမ္ပဏီကို မိန်းကွန်း Main Contractor ဟုခေါ်ပြီး၊ ထိုပထမကုမ္ပဏီမှ ထပ်ငှားသောကုမ္ပဏီငယ်များကို ဆပ်ကွန်း Sub Contractor ဟု ခေါ်သည်။
အများအားဖြင့် Civil work လုပ်သည့်ကုမ္ပဏီက မိန်းကွန်းတစ်ခုတည်းယူပြီး၊ ထိုကုမ္ပဏီမှ M&E စက်မှု၊ လျှပ်စစ်လုပ်ငန်းများအတွက် Sub-con ထပ်ငှားပါသည်။ နောက်ဆုံးအဆင့်တွင် OEM Original Equipment Maker ဟုခေါ်သော ပစ္စည်းရောင်းချသူများရှိပါသည်။ ဥပမာ လျှပ်စစ်မီးခလုပ်တစ်ခုကို ဆပ်ကွန်းကုမ္ပဏီ လေးတစ်ခုက တပ်ဆင်ခဲ့ပြီး၊ အလုပ်ရှင် Client မှ မကြိုက်ပါက (သတ်မှတ်ချက်နှင့်မကိုက်ညီပါက) အသစ်ပြန်လဲခိုင်းသောအခါ အဆင့်ဆင့် ညွန်ကြားရသဖြင့် အလုပ်ရှုပ်လှပါသည်။
၂။ လုပ်ငန်းခွင်ဘေးအန္တရယ်ဌာန Safety
Safety: အနောက်နိုင်ငံများတွင် လူများ ပညာတတ်၊ အသိတရားရှိသောကြောင့် မိမိအန္တရယ်ကို မိမိဘာသာကာကွယ်နိုင်သည်။ စင်ကာ ပူတွင် နိုင်ငံတကာ တရုတ်၊ ကုလား၊ မလေးရှား၊ မြန်မာ၊ ဘင်္ဂလား၊ ဖိလိပင်း စသဖြင့် အလုပ်သမားများစွာရှိသည်။ ပညာမတတ်သူများ သောကြောင့်လည်းကောင်း၊ အင်္ဂလိပ်စကား ကောင်းကောင်းနားမလည်သောကြောင့်လည်ကောင်း လုပ်ငန်းခွင်အန္တရာယ်ကာကွယ်ရေးအတွက် Safety Course, Safety Officer များစွာ တင်းကျပ်ထားရသည်။ မြန်မာ၊ တရုတ်၊ အိန္ဒိယ စသည့်နိုင်ငံများတွင် Safety မတင်း ကြပ်ခြင်းမှာ အလုပ်သမားထိခိုက်၊ သေဆုံးမှုများကို အစိုးရက မသိချင်ယောင်ဆောင်ပြီး၊ ကုမ္ပဏီက လျော်ကြေးမပေးကြပါ။ စင်ကာပူသည် လူ့အခွင့်အရေးနိုင်ငံကြီးများနှင့်ဆက်ဆံရသောကြောင့် လျော်ကြေးပေးရသည်။ ထိခိုက်မှုအတွက် လျော်ကြေးငွေမှာ အလွန်များလှသော ကြောင့် ကုမ္ပဏီတိုင်း အလုပ်သမားအာမခံများလုပ်ထားရသည်။ အာမခံကုမ္ပဏီများကလည်း Safety သင်တန်းအောင်ရမည် သတ်မှတ်ထား သည်။ စင်ကာပူအစိုးရကလည်း Safety သင်တန်းကို အလုပ်သမား၊ ဆူပါဗိုက်စာ၊ မန်နေဂျာ စသဖြင့် အဆင့်အမျိုးမျိုး၊ သင်တန်းအမျိုးမျိုး ရှိသည်။ ထိုသင်တန်းမအောင်ပါက ဆောက်လုပ်ရေးလုပ်ငန်းတွင် လုပ်ခွင့်မရပါ။
ဥပမာအားဖြင့် ဆပ်ကွန်းတစ်ခုက လျှပ်စစ်မီးခလုပ် ၅၀ ခန့်ကို သွားတပ်ပေးရမည့်အလုပ်ရရှိပါက
၁။ ဆောက်လုပ်ရေး လုပ်ငန်းတွင်းဝင်ရောက်အလုပ်လုပ်ခွင့်လျှောက်ရသည်။ လိုအပ်ချက်များမှာ
- ဆပ်ကွန်းကုမ္ပဏီ အာမခံနှစ်စဉ်ကြေးပေးပြီး စာရွက် (လုပ်ငန်းခွင်ထိခိုက်မှုသည် ဆပ်ကွန်းတာဝန်သာဖြစ်ကြောင်း)
- အလုပ်သမားစာရင်းနှင့် ဆောက်လုပ်ရေးကုမ္ပဏီ မိန်းကွန်းကျင်းပသော သီးသန့် Safety Course တက်ရန်
- လျှပ်စစ်အလုပ်ဖြစ်ပါက အထူးသင်တန်းများထပ်မံတက်ရန် (ဥပမာ ..Logout, Tagout course, Clean Room rule course ..etc)
- မည်သို့အလုပ်လုပ်မည်ကို အသေးစိတ်ဖေါ်ပြချက်များ RA (Risk Assessment) and Method of Statement
- အလုပ်သမား၊ မော်တော်ယာဉ် ၀င်ထွက်ခွင့်ပါမစ်များ
- Declare Form ယူလာသည့်ပစ္စည်းများစာရင်း
- အထူးအလုပ်ပါမစ်များ ဥပမာ ဓာတ်ငွေ့၊ ဓာတုပစ္စည်များ၊ Hot work များဖြစ်သော welding ဂဟေဆော်ခြင်း၊ ဂတ်စ်ကပ်တာ gas cutting, ဂရိုင်းဒါ grinding .. စသည်တို့ကို ပြင်ဆင်ရသည်။ မိမိကုမ္ပဏီမှ မန်နေဂျာနှင့် Government certified Safety Officer များ လက် မှတ်ထိုးရသည်။ ပြီးမှ ဆောက်လုပ်ရေး၊ လုပ်ငန်းရှင်၊ ဆပ်ကွန်းတာဝန်ရှိသူများက လက်မှတ်ထိုး၊ အတည်ပြုမှ အလုပ်စတင်လုပ်ရသည်။
၂။ အလုပ်လုပ်ခွင်ဝင်သည်နှင့် Safety PPE (Personal Protective Equipment) ဟုခေါ်သော ခါးပတ်၊ ဦးထုပ်၊ မျက်မှန်၊ သံဖိနပ်၊ နားကြပ်၊ လက်အိတ် စသည်တို့ကို ၀တ်ဆင်သွားလာ၊ လုပ်ကိုင်ရသည်။ လုပ်ငန်းခွင်အတွင်း Safety PPE ၀တ်ဆင်မှုကို လိုက်ကြည့်နေသည့် တာဝန်ရှိသူများစွာရှိသည်။ သူတို့ ဓာတ်ပုံရိုက်ခံရပြီး စစ်ဆေးမေးမြန်းခံရပါက မဖြေနိုင်၊ မဖြေတတ်လျှင် မိမိကုမ္ပဏီသို့ ချက်ချင်းအတိုင် ခံရသည်။ အချို့ စည်းကမ်းကြပ်ချိန်များတွင် ထိုသူများကို ချက်ခြင်းလုပ်ငန်းခွင်မှထုတ်ပယ်ခြင်း၊ အလုပ်မှထုတ်ပယ်ခြင်းများ ဖြစ်သွား လေ့ရှိသည်။ တစ်ယောက်၊ နှစ်ယောက်ကို စံနမူနာအဖြစ်ထုတ်ပယ်ပြလိုက်မှ ကျန်လူများစည်းကမ်းလိုက်နာလာသည်။ No compromise for Safety .. ဟု လုပ်ငန်းခွင်ဘေးအန္တရယ်ကင်းရှင်းရေးကို အထူးဂရုပြုကြသည်။
၃။ အလုပ်လုပ်နေစဉ်တွင်လည်း အလုပ်သမားများကို လာရောက်စစ်ဆေးသူများ ရောက်လာတတ်သည်။ ဥပမာ .. လျှပ်စစ်အလုပ်ဆိုပါက Work Permit, RA, Method of Statement မည်ကဲ့သို့လုပ်မည်နည်း၊ ကျွမ်းကျင်သူဟုတ်မဟုတ် စစ်ဆေးတတ်သည်။ Skilled Worker များသာလုပ်ခွင့်ပေးသောကြောင့် ကုမ္ပဏီဆပ်ကွန်းများမှာ အိန္ဒိယအလုပ်သမား၊ မလေးရှားဆာရာဝပ်မှ ပညာမတတ်သော အလုပ်သများ များကို တစ်လ ဒေါ်လာ ၆၀၀ ခန့်သာ ပေးပြီးလုပ်ခိုင်းနေရသည်။ အလုပ်သမား ၅ ယောက်ခန့်ကို အုပ်ချုပ်သော ဆူပါဗိုက်ဆာတစ်ဦး အမြဲရှိ နေရသည်။ သို့မှသာ အလုပ်ကောင်းမွန်စွာပြီးနိုင်မည်။ တခါတစ်ရံ လျှပ်စစ်အလုပ်ကို လုပ်ခွင့်အထူးလက်မှတ်များ၊ ဥပမာ.. Liew License of Electrical Work များ တောင်းကြည့်တတ်သည်။
ထို့ကြောင့် ဆောက်လုပ်ရေးအလုပ်တွင် ပါမစ်များ၊ အသေးစိတ်စစ်ဆေးခြင်း၊ လုပ်ငန်းခွင်တွင်း အသေးစိတ် စစ်ဆေးခြင်းများလုပ်လာပါက တော်တော်ခက်ခဲလာတတ်သည်။ ဆူပါဗိုက်စာများသည် မိမိအလုပ်သမားများကို ကောင်းစွာထိန်းထားပြီး၊ သက်ဆိုင်ရာအလုပ်ရှင်နှင့် Safety ၀န်ထမ်းများကိုလည်း ကောင်းစွာပေါင်းသင်းထားရပါသည်။
● ၀င်ငွေနှင့်လစာ
စင်ကာပူနိုင်ငံသေးသေးကလေးတွင် ဆောက်လုပ်ရေးလုပ်ငန်းကို တပြုံကြီးလုပ်ကြပါသည်။ လူအများမြင်သော အဆောက်အဦးဆောက်လုပ်ခြင်းများတွင် ကွန်ဒိုမီဒီယံများ၊ ရှော့ပင်စင်တာများ၊ ရုံးအဆောက်အဦများ ..စသည့်ဆောက်လုပ်ရေးလုပ်ငန်းများဖြစ်သည်။ တနှစ်၊ ၂ နှစ်အတွင်း ပြီးစီးသွားတတ်သည်။ ကားလမ်း၊ ရထားလမ်းဆောက်လုပ်ခြင်းများမှာ နှစ်ရှည်စီမံကိန်းများဖြစ်ကြသည်။ ထိုလုပ်ငန်းအတွက် အလုပ်သမားအများစုမှာ ဘင်္ဂလား၊ အိန္ဒိယ၊ တရုတ်နိုင်ငံသားများဖြစ်ကြသည်။ ဆောက်လုပ်ရေးအလုပ်သမားမှာ စင်ကာပူတွင် လစာအ လွန်နည်းလှပေသည်။ နေပူထဲတွင်လုပ်ကိုင်ရသဖြင့် နိုင်ငံခြားသားများသာ လုပ်ကိုင်ကြသည်။ ဆောက်လုပ်ရေးလုပ်ငန်းထက်လစာနည်း သော ဟိုတယ်၊ စားသောက်ဆိုင်၊ ဈေးရောင်း စသည့်လုပ်ငန်းများမှာ အဆောက်ဦတွင်း လေအေးစက်အခန်းများတွင်လုပ်ရသောကြောင့် စင်ကာပူနိုင်ငံသား၊ ပညာမတတ်သူများလုပ်ကိုင်ကြပါသည်။
ဆောက်လုပ်ရေးထက်ပိုပြီးဝင်ငွေများသော အလုပ်ကိုင်များမှာ၊ သင်္ဘောကျင်းအလုပ်သမား၊ စက်ရုံအလုပ်ရုံများ၊ ဘဏ်များ၊ ငွေစာရင်းအင်း အလုပ်များ၊ စီမံခန့်ခွဲရေးအလုပ်များ၊ ရေနံနှင့်ဓာတုလုပ်ငန်း၊ ကမ်းလွန်ရေနံလုပ်ငန်းတို့ဖြစ်သည်။
စင်ကာပူနိုင်ငံ၊ အလုပ်မန်မနေဂျာများလစာစာရင်းကို စာရင်းအင်း၊ အချက်အလက်များမှ ထုတ်ပြန်ချက်အရ ဟိုတယ်၊ စားသောက်ဆိုင် မန်နေဂျာများမှာ လစာ စင်ကာပူဒေါ်လာ ၃၀၀၀ ပတ်ဝန်းကျင်ရရှိကြသည်။ ဆောက်လုပ်ရေးမန်နေဂျာများမှာ လစာ ၄၀၀၀ ခန့်ရရှိကြပြီး၊ သင်္ဘောကျင်း၊ ဘဏ်၊ ရေနံလုပ်ငန်းမန်နေဂျာများမှာ လစာ ၆၀၀၀ အထက်ရရှိကြသည်။ အလုပ်သမားအဆင့်တွင်မူ လစာဒေါ်လာတစ်ထောင် ပတ်ဝန်းကျင်သာရကြသည်။ အချိန်ပိုများများလုပ်မှ လစာများများရကြသော်ကြောင့် စင်ကာပူတွင် အချိန်ပိုမရှိသောအလုပ်သမားများမှာ သိပ်အဆင်မပြေကြပါ။
● ဆောက်လုပ်ရေးလုပ်ငန်းအခေါ်အဝေါ်အချို့
အောက်ဖေါ်ပြပါအချက်များမှာ ဆောက်လုပ်ရေးလုပ်ငန်းအခေါ်ဝေါ်များဖြင့်ရေးထားသည့် အလုပ်သဘောသဘာဝ၊ ရာထူးအခေါ် အဝေါ် များဖြစ်သည်။ ဆောက်လုပ်ရေးလုပ်ငန်းများ အသေးစိတ်အခေါ်အဝေါ်များလည်းရှိသော်လည်း အကြမ်းဖျင်းတင်ပြခြင်းသာ ဖြစ်ပါသည်။
Civil Work
ဂျီအော်လိုဂျစ်အလုပ်များ၊ ပိုင်ရိုက်ခြင်းလုပ်ငန်း၊ ကွန်ကရစ်လုပ်ငန်း (အုတ်၊သဲ၊ကျောက်)။ ငြမ်းဆင်ခြင်းနှင့် ပစ္စည်းမတင်သည့်ကရိန်းလုပ်ငန်း
M&E လုပ်ငန်း
Electrical, Air-con, Building Security, Fire Alarm, Process Facility (Water, Chemical, Gas ..etc), Equipment Facility
အလုပ်ပြီးစီးကြောင်း စစ်ဆေးခြင်း
RTO, Subcon and Main con test & commissioning.
အလုပ်ရှင်မှ စစ်ဆေးခြင်း
Client, Consultant and Main Con
Red line drawing and final drawing,
သတ်မှတ်ချက်နှင့်မကိုက်ညီချက်များ ချက်ခြင်းပြင်ဆင်ခြင်း
Client –> Main Con
Main Con –> Sub Con
Sum Con –> OEM
Service Report
Billing and Invoice for additional works, PO, DO
Payment,
တစ်နှစ်အာမခံ Warranty Period
Client – never pay additional work
Subcon to spend money
All issues , try to hid by Main Con
Client take all responsibilities
Maintenance work (normally it is sub-con by OEM or Main Con)
● မြန်မာအလုပ်သမား၊ အင်ဂျင်နီယာ၊ စူပါဗိုင်စာများ
WP အခြေခံအလုပ်သမားများဖြစ်သည်။ အေးဂျင့်များမှတဆင့် အလုပ်ခန့်သည်။ မြန်မာပြည်တွင်အေးဂျင့်များစွာရှိပြီး၊ ပထမဆုံး အလုပ် စတင်ရှာဖွေသော မြန်မာလူငယ်များစွာ အလိမ်ခံရတတ်သည်။ မိမိကိုယ်တိုင်၊ (သို့မဟုတ်) မိမိဆွေမျိုးများ ပထမဆုံး စင်ကာပူအလုပ် လုပ် မည်ဆိုလျှင် အတွေ့အကြုံရှိသူများထံ ချဉ်းကပ်၊မေးမြန်းပြီး အေးဂျင့်ရွေးချယ်တတ်ရန်လိုသည်။ ယခု ၂၀၁၂ ဆောက်လုပ်ရေးလုပ်ငန်း အတွက် လူသစ်များကို အေးဂျင့်အခ စင်ကာပူဒေါ်လာ၂၀၀၀ ခန့် (လေယဉ်ခအပါဝင်) ဈေးပေါက်သည်။
S.pass အလုပ်သမားများကို စီမံခန့်ခွဲရန်အတွက် လစာ၂၀၀၀အထက်ပေးသော ရာထူးဖြစ်သည်။ ဘွဲ့တခု (သို့မဟုတ်) ဒီပလိုမာတခု အနည်းဆုံးရထားမှ အစိုးရက S-pass ချပေးသည်။ အချို့လည်း လစာနှင့်အိုဗာတိုင် ဒေါ်လာ၂၀၀၀ ခန့်ပေးပြီး၊ တနေ့ ၁၄ နာရီခန့် နားရက် မရှိ လုပ်နေရသူများရှိသည်။ ဆောက်လုပ်ရေးကုမ္မဏီ၏ ရုံးအလုပ်၊ စာရေး၊ စာချီ၊ ငွေစာရင်းများဌာနများတွင် လုပ်ကိုင်နေသူများစွာလည်း ရှိသည်။
PR, Citizen စင်ကာပူတွင် အမြဲနေထိုင်ခွင့်ရရှိသောအဆင့်ဖြစ်သည်။ စင်ကာပူနိုင်ငံသားများနည်းတူ အခွင့်အရေးများရရှိသောကြောင် သိပ် ပင်ပန်းကြီးစွာလုပ်ရခြင်းများမရှိတော့ပဲ၊ အင်္ဂလိပ်စကားနှင့် အုပ်ချုပ်မှုများကို ကျွမ်းကျင်သူများဖြစ်သောကြောင့် လစာလည်းကောင်း ကောင်းရကြပါသည်။ မြန်မာများစွာ စင်ကာပူနိုင်ငံသားအဖြစ် ပြောင်းလဲခံယူသွားကြသူများ ဆောက်လုပ်ရေး၊ အထက်တန်းရာထူးများတွင် ကျွမ်းကျင်စွာလုပ်ကိုင်နေသြသည်။ ဒီဇိုင်းဌာန၊ ကန်ထရိုက်ရရှိရေးဌာန၊ ပစ္စည်းရောင်းဝယ်ရေးဌာန စသည့်အရေးပါသောဌာနများတွင် လုပ်ကိုင်ကြသည်။ ထိုသူများသည် စင်ကာပူ ပိုလီဒီပလိုမာ၊ စင်ကာပူတက္ကသိုလ်များမှာ ဘွဲ့များ၊ မာစတာဘွဲ့များကို ရရှိထားကြသူများ ဖြစ်ကြသည်။
● မြန်မာများအတွက် အလုပ်အကိုင်အလားအလာ
ဆောက်လုပ်ရေးအလုပ်အကိုင်များမှာ အမြဲတမ်းရှိနေမည်ဖြစ်သည်။ စင်ကာပူတွင် မြေတကွက်ကို နှစ် ၃၀ ခန့်သာ အစိုးရဂရမ်ပေးထားသော ကြာင့် အားလုံးသောလုပ်ငန်းအဆောက်အဦများမှာ သက်တန်းပြည့်ပါက အစိုးရကပြန်သိမ်း၊ လေလံပစ်၊ အဆောက်အဦး ဟောင်းများကို ဖြိုဖျက်ကာ အသစ်ချက်ချွတ်များကို အဆက်မပြက်ဆောက်နေရပါသည်။ အချို့အလုပ်ရုံ၊ ရှော့ပင်စင်တာ၊ စက်ရုံများ၊ ဟိုတယ်များ၊ ကွန်ဒို လူနေအဆောက်အဦများကို သတ်မှတ်ချိန်မတိုင်မီပင် လျော်ကြေးပေးကာ ဖျက်သိမ်းပြီး၊ အသစ်ပြန်လည်ဆောက်လုပ်ကြသည်။
နောင်တွင် မြန်မာပြည်တွင်လည်း ဆောက်လုပ်ရေးလုပ်ငန်းများစွာပေါ်ပေါက်လာမည်ဖြစ်သောကြောင့် ပညာမတတ်သော၊ လယ်သမား အဆင့် မြန်မာများသာ စင်ကာပူဆောက်လုပ်ရေးအလုပ်များကို လာရောက်လုပ်ကိုင်ဖွယ်ရှိသည်။ (သို့မဟုတ်) စင်ကာပူဆောက်လုပ်ရေးလုပ်ငန်းများတွင် မြန်မာအလုပ်သမား လုံးဝမရှိတော့ပဲ၊ မြန်မာလူမျိုး အရာရှိ၊အင်ဂျင်နီယာများသာ လုပ်ကိုင်ကြမည် မျှော်လင့်ပါသည်။
အနာဂတ်အတွက် အဆောက်အဦးဆောက်လုပ်ရေးလုပ်ငန်းများတွင် မြန်မာများ လုပ်ချင်တော့မည်မဟုတ်ပါ။ သို့သော် ကျွမ်းကျင်မှု လိုအပ်သော စက်ရုံ၊ ရေနံဓါတု၊ ကမ်းလွန်ရေနံတူးစင်၊ ရေနံတင်သင်္ဘော၊ စသည့် အဆင့်မြင့်ဆောက်လုပ်ရေးလုပ်ငန်းများတွင် လစာ ကောင်းကောင်းပေးနေမည်ဖြစ်သောကြောင့် မြန်မာအလုပ်သမား၊ စူပါဗိုက်စာ၊ အင်ဂျင်နီယာများ ဆက်လက်ဈေးကောင်းနေမည်သာဖြစ် သည်။

….. ….. …… ….. ….
၁၃ ဇန္န၀ါရီ၂၀၁၂ မှာ ရှစ်လေးလုံးကျောင်းသားဟောင်းများ၊ သံယာအရေးအခင်းလှုပ်ရှားသူများနဲ့ ယုံကြည်ချက်ဖြင့်အကျဉ်းကျနေသူများစွာ၊ ထောက်လှမ်းရေးဗိုလ်ချုပ်ကြီး (ပြုတ်) ဦးခင်ညွန့်တို့အပါဝင် လွတ်မြောက်လာကြပါပြီ။ သမ္မတကြီးဦးသိန်းစိန်နဲ့အစိုးရသစ်ရဲ့ စနစ်တကျပြုပြင်ပြောင်းလဲမှုများဟာအံ့သြစရာကောင်းလှအောင်စနစ်ကျလှပါတယ်။ ကျွန်တော်လည်းစစ်အာဏာရှင်စနစ်ကျဆုံးရေးလှုပ်ရား၊ရေးသားမှုများကိုရပ်ပြီး၊ ၀ိသမစီးပွားရေးသမားများကြားမှာ စစ်မှန်သောမျိုးချစ်စိတ်နဲ့စီးပွားရေးတောင့်တင်းခိုင်မာတဲ့ အမိမြန်မာပြည်သစ်ကြီးအတွက် သဲတပွင့်လောက် အထောက်ကူပြု စာများ ရေးချင်ပါတယ်။ ဆောက်လုပ်ရေးလုပ်ငန်းဆိုသည်မှာ ပထမဆုံးစိးပွားရေးလုပ်ငန်းအဖြစ်မြန်မာပြည်မှာပွင့်လန်းလာတော့မှာပါ။ အာဏာရှင်ဗိုလ်ချုပ်ကြီးနဲ့ပိုင်လို့ ကန်ထရိုက်ပါမစ်ရသွားတဲ့လူ မိုးကျရွှေကိုယ်များကတော့ရှိနေဦးမှာဖြစ်ပေမဲ့ ..အနစ်နာခံ လုပ်သွားခဲ့တဲ့ ဆောက်လုပ်ရေးကန်ထရိုက်တာများ (ယခုအခါ ..ဒုက္ခရောက်၊ ဆင်းရဲနေသူ များစွာ) မြန်မာပြည်တွင်းမှာ ရှိနေပါတယ်။ ၀ိသမလောဘသမားများ ကြီးစိုးထားတဲ့ မြန်မာပြည်ဆောက်လုပ်ရေးလောကကို ပြုပြင်ပြောင်းလဲအောင် သမ္မတကြီးဦးသိန်းစိန်အစိုးရ ကိုင်တွယ်နိုင်မယ်မျှော်လင့်ပါတယ်။

Posted in: ၀၈။ ဆောင်းပါး