လက်ရှိမြန်မာ့နိုင်ငံရေးအခြေအနေနှင့် ၂၀၁၂ ခုနှစ် အလားအလာသုံးသပ်ချက်

သန်းဝင်းလှိုင်
ဇန်န၀ါရီ ၂၆၊ ၂၀၁၂

`၈၈´ ဒီမိုကရေစီအရေးတော်ပုံကြီးကို လက်နက်အားကိုးဖြင့် အတင်းအဓမ္မ ဖြိုခွင်းခဲ့ပြီးနောက် တက်လာသော န၀တ၊ နအဖ စစ်အစိုးရသည် ၁၉၉၀ ပြည့်နှစ် ရွေးကောက်ပွဲ မဲအပြတ်အသတ်အနိုင်ရရှိသော NLD ၏ရလဒ်ကိုမျက်ကွယ်ပြုကာ ၂၀၁၀ ပြည့်နှစ် နိုဝင်ဘာလ ၇ ရက်တွင် ၂၀၀၈ နာဂစ်ဖွဲ့စည်းပုံဖြင့် အတုအယောင်ရွေးကောက်ပွဲကို ကျင်းပပေးခဲ့သည်။ ယင်းနောက် ရွေးကောက်ပွဲတွင် ကြံ့ဖွံ့ပါတီ အနိုင်ရရှိသည်ဟု နအဖအစိုးရကကြေညာ၍ သမ္မတဦးသိန်းစိန်ဦးဆောင်သောအစိုးရသစ်ကို ၂၀၁၁ခု မတ်လ ၃၁ ရက်နေ့တွင် အာဏာလွှဲပြောင်း ပေးခဲ့သည်။

ဤသို့ဖြင့် နအဖစစ်အစိုးရလက်ထက်၌ ၀န်ကြီးချုပ်ဖြစ်ခဲ့သော ဗိုလ်ချုပ်ကြီးသိန်းစိန်သည် သမ္မတဖြစ်လာသည့်နေ့၌ ပြောကြားခဲ့သော မိန့် ခွန်းထဲ၌ … “အခြေအနေအချိန်အခါနှင့် လိုက်လျောညီထွေရှိသည့် မူဝါဒများ၊ လုပ်ငန်းစဉ်များကိုချမှတ်ပြီး ကျွန်တော်တို့အစိုးရသစ် အနေ နှင့် ဆောင်ရွက်သွားမည်ဖြစ်ပါကြောင်း၊ နိုင်ငံရေးအင်အားဆိုသည်မှာ တိုင်းရင်းသားစည်းလုံးညီညွတ်ရေးပဲဖြစ် ကြောင်း၊ လူမျိုးစု ပေါင်း ၁၀၀ ကျော်နှင့် စုစည်းနေထိုင်ကြသည့် ကျွန်တော်တို့နိုင်ငံအတွက် တိုင်းရင်းသားစည်းလုံးညီညွတ်ရေးသည် အလွန်အရေးကြီးပါကြောင်း၊ တိုင်းရင်းသားစည်းလုံးညီညွတ်မှုပြိုကွဲရင် နိုင်ငံတော်ကြီးလည်း အစိပ်စိပ်အမွှာမွှာ ပြိုကွဲပျက်စီးသွားမည်ဖြစ်သည့်အတွက် တိုင်းရင်းသား စည်းလုံးညီညွတ်ရေးကို အထူးအလေးထားပြီး တည်ဆောက်သွားမည်ဖြစ်ပါကြောင်း၊ အမျိုးသားပြန်လည်ပေါင်းစည်းညီညွတ်ရေးနှင့် ပတ်သက်ပြီး ဒီကနေ့အထိ မူဝါဒလမ်းစဉ် (၇) ရပ်နှင့် ဖွဲ့စည်းပုံအခြေခံဥပဒေကို လက်မခံလိုကြသေးသည့် ပြည်တွင်းပြည်ပရှိ လူပုဂ္ဂိုလ်အဖွဲ့ အစည်းများ၊ ဥပဒေပြင်ပရှိ အဖွဲ့အစည်းများရှိနေကြပါကြောင်း၊ မတူညီသည့်သဘောထားအမြင်များရှိကြမှာဖြစ်သော်လည်း တိုင်းပြည်၏ အကျိုးစီးပွားအတွက် တူညီသည့်ကိစ္စများတွင် ပူးပေါင်းပါဝင်ဆောင်ရွက်ကြမည်။ ဒီမိုကရေစီကျင့်စဉ်နှင့်အညီ ရွေးကောက်ပွဲတွင် ပါဝင် ယှဉ်ပြိုင်ကြပြီး လုပ်ပိုင်ခွင့်အာဏာကို တရားနည်းလမ်းကျနစွာဖြင့် ရယူကြမည်ဆိုလျှင် လူသာဓုခေါ် နတ်သာဓုခေါ်ကြမည်ဖြစ်သည့် အတွက် ကျွန်တော်တို့အစိုးရအဖွဲ့အနေဖြင့် ငြိမ်းချမ်းရေးတံခါးကိုဖွင့်ထားပြီး လက်ကမ်းကြိုဆိုနေမည်ဖြစ်ကြောင်း၊ ကျွန်တော်တို့ အစိုးရ အဖွဲ့သည် လွှတ်တော်အတွင်းရှိနိုင်ငံရေးပါတီများ၊ လွှတ်တော်ပြင်ပရှိစိတ်ရင်းစေတနာမှန်ကန်သည့် နိုင်ငံရေးအင်အားစုများ၊ အရပ်ဘက်လူမှုအဖွဲ့အစည်းများအားလုံးနှင့် ပူးပေါင်းဆောင်ရွက်သွားမည်ဖြစ်ကြောင်း ကတိပြုပြောကြားလိုပါကြောင်း၊ ဒီမိုကရေစီသည်ကောင်းမွန် သော အုပ်ချုပ်မှုစနစ်နှင့်တွဲဘက်မှ အောင်မြင်နိုင်မည်ဖြစ်ပါကြောင်း၊ ထို့ကြောင့် မြန်မာနိုင်ငံ၏ ဒီမိုကရေစီအသွင်ကူးပြောင်းရေးဖြစ်စဉ်အစတွင်တာဝန်ယူရသည့် ကျွန်တော်တို့အစိုးရအဖွဲ့အနေဖြင့် ကောင်းမွန်သောအုပ်ချုပ်မှုစနစ် ပေါ်ပေါက်လာအောင် အလေးထားလုပ်ဆောင် သွားမည်ဖြစ်ပါကြောင်း၊ နိုင်ငံနှင့် ပြည်သူ၏ အနာဂတ်ဘ၀သာယာလှပအောင် တရားမျှတခြင်း၊ လွတ်လပ်ခြင်းနှင့် ညီမျှခြင်းတည်းဟူသော လောကပါလတရားများ ထွန်းကားသည့် ဒီမိုကရေစီနိုင်ငံတော်ကြီး ရေရှည်တည်တံ့ရှင်သန်အောင် ကျွန်တော်တို့ကိုယ်စွမ်းဉာဏ်စွမ်းရှိသ မျှ ကြိုးပမ်းမြှင့်တင်စွမ်းဆောင်သွားပါမည်ဟု ကတိပြုပြောကြားရင်း တဖက်ကလည်း ကျွန်တော်တို့နှင့်အတူ အားလုံး စည်းစည်းလုံးလုံး ညီညီညွတ်ညွတ်နှင့် ကိုယ့်တိုင်းပြည်အတွက် ပူးပေါင်းလက်တွဲဆောင်ရွက်သွားကြပါဟု ဖိတ်ခေါ်တိုက်တွန်းပါကြောင်း” ဟု ထည့်သွင်းပြော ကြားသွားသည်။

ထို့အပြင် သမ္မတဦးသိန်းစိန်သည် ၂၀၁၁ သြဂုတ် ၁၉ ညနေ ၄ နာရီတွင် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် သမ္မတ အိမ်တော်ရုံးခန်း၌ ပထမဆုံးတွေ့ဆုံဆွေးနွေးခြင်း၊ အမျိုးသားဒီမိုကရေစီအဖွဲ့ချုပ်ကိုမှတ်ပုံတင်နိုင်ရန် ရွေးကောက်ပွဲဥပဒေအချို့ ပြင်ဆင် ပေးခဲ့ခြင်း၊ ငြိမ်းချမ်းစွာစုဝေးဆန္ဒပြခွင့်၊ အသင်းအပင်းဖွဲ့စည်းခွင့်၊ ဥပဒေများ ပြဌာန်းပေးခဲ့ခြင်း၊ ဧရာဝတီမြစ်စုံစီမံကိန်းရပ်ဆိုင်းလိုက်ခြင်း၊ ပုဂ္ဂလိကကျောင်း တည်ထောင်ခွင့်အပါအ၀င် ပညာရေးကဏ္ဍအချို့ပြုပြင်ပြောင်းလဲမှုများ ပြုလုပ်ပေးခြင်း၊ စာနယ်ဇင်းလွတ်လပ်ခွင့် ဖြေ လျော့ပေးခဲ့ခြင်း၊ ၈၈ ကျောင်းသားခေါင်းဆောင်များ၊ တိုင်းရင်းသားခေါင်းဆောင်များ ပါဝင်သော မိမိယုံကြည်ချက်ကြောင့် ဖမ်းဆီးခံခဲ့ရသော နိုင်ငံရေးအကျဉ်းသားများ ပြန်လည်လွှတ်ပေးခဲ့ခြင်း၊ ရာစုနှစ်ဝက်ကာလအတွင်း ပထမဆုံးအကြိမ်အဖြစ် အမေရိကန်နိုင်ငံခြားရေးဝန်ကြီး ဟီလာရီကလင်တန်၊ မြန်မာနိုင်ငံဆိုင်ရာ အထူးကိုယ်စားလှယ်နှင့်မူဝါဒရေးရာ ညှိနှိုင်းရေးမှူး ဒဲရစ်မစ်ချယ်၊ ဂျပန်နိုင်ငံခြားရေးဝန်ကြီး မစ္စ တာခိအိချိရိုဂင်းဘဦးဆောင်သော ကိုယ်စားလှယ်အဖွဲ့၊ ဒိန်းမတ်နိုင်ငံ ဖွံ့ဖြိုးမှုဆိုင်ရာ ပူးပေါင်းဆောင်ရွက်ရေးဝန်ကြီး ခရစ်စတီးယန်းဖရစ် ဘာ့ဒ်၊ ဗြိတိန်နိုင်ငံခြားရေးဝန်ကြီး ၀ီလျံဟိတ် စသည့် ကမ္ဘာ့ခေါင်းဆောင်များ အလည်အပတ်ခရီးရောက်ရှိကာ မြန်မာနှင့်နိုင်ငံတကာဆက်ဆံရေးမျက်နှာသစ် ဖွင့်လှစ်နိုင်ခဲ့ခြင်း၊ တိုင်းရင်းသားလက်နက်ကိုင်အဖွဲ့အချို့နှင့် အပစ်အခတ်ရပ်ဆိုင်းရေးစာချုပ်ချုပ်ဆိုနိုင်ခြင်း စသည့် နိုင်ငံရေး၊ စီးပွားရေး၊ ပညာရေး၊ ကျန်းမာရေး၊ လူမှုရေးပြောင်းလဲမှုများကြောင့် အနာဂတ်မြန်မာနိုင်ငံအတွက် အပေါင်းလက္ခဏာဆောင်သော တိုးတက်မည့်အရိပ်အယောင်ဟု ဆိုရပေမည်။

သမ္မတဦးသိန်းစိန်၏ အကြံပေးပုဂ္ဂိုလ် ဒေါက်တာနေဇင်လတ်ကလည်း … “အပြောင်းအလဲရဲ့သဘာဝကိုသုံးသပ်ရရင် စစ်မှန်တဲ့အပြောင်း အလဲပါ။ နောက်ကြောင်းပြန်မလှည့်တဲ့အပြောင်းအလဲလို့ မြင်ပါတယ်။ အပြောင်းအလဲမှာ ရှုထောင့်တခုကကြည့်ရင် အဆင့် (၃) ဆင့်ရှိ တယ်။ ဥပမာပေးရရင် သမီးရည်းစားအဆင့်ပေါ့။ နောက်တဆင့်က စေ့စပ်ကြောင်းလမ်းပြီးစီးခြင်း၊ နောက်ကြောင်းပြန်လှည့်ခွင့် သိပ်နည်း သွားပြီ။ နောက်ဆုံးတဆင့်က လက်ထပ်ပြီးစီးခြင်းပဲ။ အခုအဆင့်က အဆင့် (၂) ကို ရောက်လုနီးပြီလို့ သုံးသပ်ပါတယ်။ မကြာခင်ကာလမှာ နောက်ကြောင်းပြန်လှည့်လို့မရတဲ့ စေ့စပ်ကြောင်းလမ်းခြင်းအဆင့်ကို ရောက်တော့မယ်လို့ ယူဆတယ်။ ဒီပုံစံအတိုင်း ပြောင်းလဲပြီး စီမံကိန်း နဲ့ အစီအစဉ်ကောင်းတွေကို ရေးဆွဲနိုင်ရင် (၁၅) နှစ်လောက်ဆို မြန်မာနိုင်ငံဟာ အာဆီယံအသိုင်းအ၀န်းကို မီနိုင်မယ်လို့ မျှော်လင့်ပါတယ်။ အဓိကကတော့ ဗျူရိုကရေစီယန္တရားကို ပြင်ဆင်ရမှာဖြစ်ပါတယ်။ ကျွန်တော်အစိုးရိမ်ဆုံးကတော့ ဗျူရိုကရက်တွေပါပဲ။” ဟူ၍ သူ့အမြင်ကို သုံးသပ်ပြခဲ့သည်။

မှန်ပေသည်။ ပွင့်လင်းမြင်သာသောဆောင်ရွက်ချက်များနှင့် ဒီမိုကရေစီအတွက် ပိုမိုမြန်ဆန်သော အပြောင်းအလဲများ ပြုလုပ်နိုင်ပါက နိုင်ငံ ၏ဂုဏ်သိက္ခာမြင့်မား၍ နိုင်ငံတကာမှ ပိတ်ဆို့ထားမှုများ ပြန်လည်ရုတ်သိမ်းကာ၊ ပြည်ပမှ ရင်းနှီးမြှုပ်နှံမှုများ ၀င်ရောက်လာနိုင်ပေသည်။ ရင်းနှီးမြှုပ်နှံမှုများ ဖိတ်ခေါ်ရာ၌လည်း မြန်မာ့ ရေ၊ မြေ၊ သဘာဝပတ်ဝန်းကျင်ကို ထိခိုက်မှု၊ ပြည်သူလူထု၏ ဘ၀လုံခြုံမှု ထိခိုက်မှုနှင့် လူတစ် ဦးစီ၏ လွတ်လပ်မှုနှင့် လူ့အခွင့်အရေးများ ထိခိုက်မှုမဖြစ်စေရန်အတွက် အထူးသတိထားရပေမည်။

ထို့အပြင် စနစ်ပြောင်းသည်ကို နားမလည်သေးသည့် ဒီမိုကရေစီအသိဒုန်းဝေးနေသည့် ဗျူရိုကရက်များအောက်ခြေတွင် မြောက်မြားစွာ ရှိနေသေးရာ “၀ါးရုံခုတ်ချင်လျှင် ၀ါးတက်ကို အရင်ရှင်း” ဆိုသည့်အတိုင်း ကြိုးနီစနစ်ကို ခုံခုံမင်မင်ကျင့်သုံးနေသည့် ညွှန်ချုပ်၊ ညွှန်မှူး၊ မန် နေဂျင်းဒါရိုက်တာများ စသည်တို့ကြီးစိုးနေသော ဗျူရိုကရေစီယန္တရားကိုလည်း ရိုက်ချိုးပစ်ရပေမည်။

ဝါရင့်သတင်းစာဆရာကြီး လူထုစိန်ဝင်းကလည်း …“သိသာတဲ့အပြောင်းအလဲကတော့ ဒေါ်အောင်ဆန်းစုကြည် လွတ်မြောက်လာတယ်။ နောက်တစ်ခါ ဧရာဝတီမြစ်ဆုံကိစ္စ၊ ပြည်သူလူထုရဲ့ဆန္ဒကို အစိုးရက လိုက်လျောလာတယ်။ ဒါကလည်း အပေါင်းလက္ခဏာဆောင်တဲ့ အပြောင်းအလဲပေါ့။ ဒါပေမယ့် အနှစ် ၆၀ ကျော် ပြည်တွင်းစစ်ဖြစ်နေတဲ့အတွက် တိုင်းပြည်မှာ ဘယ်လောက်ဒုက္ခတွေရောက်သလဲဆိုတာ လူတိုင်းသိပါတယ်။ ဒီပြည်တွင်းစစ်ရှိနေရင် တိုင်းပြည်လည်းမတိုးတက်နိုင်ဘူး။ ဒီမိုကရေစီစနစ်လည်း မအောင်မြင်နိုင်ဘူး။ အဓိကက ပြည်တွင်းစစ်လုံးဝရပ်စဲပြီး တိုင်းရင်းသားတွေနဲ့ ငြိမ်းချမ်းရေးပြန်လည်တည်ဆောက်ဖို့ပါပဲ” ဟူ၍ မှတ်ချက်ပြုသည်။

ယခုအခါအစိုးရသစ်သက်တမ်း တစ်နှစ်ကျော်အတွင်း သိသာထင်ရှားသည့်အပြောင်းအလဲများ ဆက်တိုက်ဖြစ်ပေါ်မှုကြောင့် မြန်မာ့ဒီမို က ရေစီလမ်းစဉ်အတွက် တိုးတက်လာသည်ဟု အများစုက ရှုမြင်ကြသည်။ တဆက်တည်းမှာပင် နိုင်ငံတကာကလည်း လက်ခံလာသောကြောင့် အမေရိကန်နှင့် အနောက်ဥရောပမှ ခေါင်းဆောင်များက မြန်မာနိုင်ငံအပေါ်ချမှတ်ထားသော စီးပွားရေးပိတ်ဆို့ထားမှု တဆင့်ပြီးတဆင့် ပြန်လည်ရုတ်သိမ်းရန် စဉ်းစားနေကြပြီဖြစ်သည်။ ထို့အပြင် မြန်မာနိုင်ငံတွင် လူ့အခွင့်အရေးတိုးတက်ရေး၊ တရားဥပဒေစိုးမိုးရေးနှင့် လာ မည့် ဧပြီလ (၁) ရက်နေ့တွင် လွတ်လပ်တရားမျှတသည့် ရွေးကောက်ပွဲကျင်းပရေးကို လက်ရှိအစိုးရအားပြုလုပ်ပေးရန် တွန်းအားပေးတိုက် တွန်းလျက်ရှိသည်။

စင်စစ် ဒီမိုကရေစီဟူသော ဝေါဟာရကို အနက်အဓိပ္ပါယ်ဖွင့်ဆိုပါက နိုင်ငံရေးအရ တန်းတူအခွင့်အရေးရခြင်း၊ စီးပွားရေးအရာ တန်းတူ အခွင့်အရေးရခြင်း၊ လူမှုရေးအရ ဘာသာရေး၊ ပညာရေး၊ ကျန်းမာရေး တန်းတူအခွင့်အရေး ရခြင်း၊ လူမျိုးရေးအရ ဖိနှိပ်မှုကင်းရှင်းခြင်း ရှိ မရှိအပေါ်တွင် တည်မီနေပေသည်။

ဒီမိုကရေစီသည် ပြဿနာများကို ငြိမ်းချမ်းစွာအဖြေရှာရန် ပြဋ္ဌာန်းပေးသည်။ မည်သည့်နိုင်ငံရေး၊ အုပ်ချုပ်ရေးစနစ်တွင်မဆို ပြဿနာများ မပေါ်ပေါက်ရန် တားမြစ်နိုင်မည်မဟုတ်ချေ။ ပေါ်ပေါက်လာသော ပြဿနာများကို မည်သို့ဖြေရှင်းရန် ပြဋ္ဌာန်းခြင်းဟူသည့် အချက်ကသာ ထိုနိုင်ငံရေးစနစ်၊ အုပ်ချုပ်ရေးစနစ်၏ ခိုင်မာမှုကို အာမခံချက်ပေးမည်ဖြစ်သည်။ ဒီမိုကရေစီထွန်းကားရန် လူမှုရေးပဋိညာဉ်ပြုမှုသီအိုရီသဘောတရား (Social Contract Theory) အပေါ် သက်ဆိုင်ရာ လူ့အဖွဲ့အစည်းဝင်ပုဂ္ဂိုလ်များက လက်ခံယုံကြည်မှု အပေါ်တွင်လည်း မူတည်ပါသည်။ လူသည် တစ်ဦးတည်းရပ်တည်ခြင်းမပြုနိုင်သဖြင့် အများနှင့်စုပေါင်းနေထိုင်လာရသည်။ မိမိ၏လွတ်လပ်မှုနှင့် အခွင့်အရေး များကို ခံစားခွင့်ရှိသကဲ့သို့ လိုက်နာစောင့်ထိန်းသွားရမည့် တာဝန်များကိုလည်း မပျက်မကွက်စောင့်ထိန်းလိုက်နာပါမှ လူမှုရေးပဋိညာဉ်ပြုမှု သဘောတရားအရ အဖွဲ့အစည်းနှင့် နေထိုင်တတ်သောလူဖြစ်လာမည်။ မည်သူမဆို ရပိုင်ခွင့် အခွင့်အရေးတစ်ခုတည်းကိုသာ အဓိကထား နေလျှင် ပဋိညာဉ်ပြုထားသော လူ့အဖွဲ့အစည်း၏ ပြင်ပတွင် နေထိုင်ရန်သာဖြစ်သည်။ လူ့အဖွဲ့အစည်းအတွင်း နေထိုင်သူတိုင်းသည် အခွင့်အရေးနှင့်တာဝန် (Rights & Obligation) သဟဇာတဖြစ်စွာ ကျင့်သုံးခြင်းဖြင့် လိုက်နာစောင့်ထိန်းခြင်း ပြုရပေမည်။ ထိုသဘောတရား အခြေခံမှ ဒီမိုကရေစီကျင့်စဉ်အတွက် ထုတ်ယူနိုင်သော သီအိုရီမှာ အများစု၏ဆန္ဒအရ အုပ်ချုပ်ခြင်း၊ အနည်းစုဆန္ဒကို လေးစားခြင်း ဆို သည့် သီအိုရီဖြစ်သည်။ လူတိုင်းသည် မိမိဆန္ဒသဘောထားကို တင်ပြခွင့်၊ ထိုအတိုင်း လုပ်ဆောင်ခွင့်ကို လိုလားကြသည်။ ဒီမိုကရေစီတွင် ဆန္ဒသဘောထားများကို တင်ပြမှု အခွင့်အရေးအပြည့်အ၀ပေးထားသည်။

သမိုင်းနောက်ခံပြန်လှန်ကြည့်ပါက ၁၉၆၂ ခုနှစ် မှ ၂၀၁၀ပြည့်နှစ်အထိ မြန်မာ့လူ့အဖွဲ့အစည်းသည် နှစ်ပေါင်း ၅၀ ခန့် ဒီမိုကရေစီမဲ့ လူမှု ပဋိညာဉ်ဖြစ်နေခဲ့ရသည်။ တရားမျှတခြင်း၊ လွတ်လပ်ခြင်းနှင့် ညီမျှခြင်းတည်းဟူသော လောကပါလတရားများ ကွယ်ပျောက်နေခဲ့ရသည်။ လူမှုပဋိညာဉ်အပြည့်အ၀မခံစားရသောကြောင့် ပြည်တွင်းစစ်မီးသည် နှစ် ၆၀ ကျော် တောက်လောင်ခဲ့ရပြီး ပြည်သူလူထုတရပ်လုံးသည် အတိဒုက္ခပင်လယ်ဝေခဲ့ရသည်။
မြန်မာ့လူ့အဖွဲ့အစည်းသည်လည်း ဖွံ့ဖြိုးတိုးတက်ရေးနှင့် အေးချမ်းသာယာရေးတို့သည် ဆိတ်သုဉ်းခဲ့ရ သည်မှာ လူတိုင်းအသိပင်ဖြစ်သည်။

ထို့ကြောင့် အာဏာလက်ရှိအစိုးရသစ်နှင့် ဒီမိုကရေစီရေးအတွက် အတိုက်အခံဘက်မှ ဦးဆောင်နေသူများသည် အချင်းချင်း ရန်ဖြစ်ငြင်း ခုံနေကြရမည့်အချိန်၊ တစ်ဦးနှင့်တစ်ဦး တစ်ဖွဲ့နှင့်တစ်ဖွဲ့ အပြစ်ရှာ အပြစ်ပြောနေရမည့်အချိန် မဟုတ်တော့ချေ။ တိုင်းပြည်အနာဂတ် နိုင်ငံ ရေးကို မိမိတို့တဖက်တည်းဖြင့် ပုံဖော်ဖန်တီး၍မရနိုင်။ တဖက်လူတို့နှင့် ဆွေးနွေးညှနှိုင်းဆောင်ရွက်ကြမှသာ မိမိတို့လိုလားသော ဒီမိုက ရေစီပန်းတိုင် ရရှိနိုင်မည်ကို ယုံကြည်ဖို့လိုပေသည်။

ထို့ကြောင့် နှစ်ပေါင်း ၅၀ ကျော် အုပ်ချုပ်မှုစနစ်အောက်၌ ခေါက်ရိုးကျိုး၍ အမြစ်စွဲနေသည့် ကြိုးနီစနစ်ဖြင့် အဂတိလိုက်စားမှု၊ ခြစားမှု၊ လာဘ်ပေးလာဘ်ယူပြုမူနေသော ဗျူရိုကရက်ယန္တရားကိုရိုက်ချိုးနိုင်မှသာ လူထုတရပ်လုံး ယုံကြည်ကိုးစားသောကောင်းသော အုပ်ချုပ်မှု စနစ် (Good Governance) နှင့် သန့်ရှင်းသော အစိုးရ (Clear Government) ပေါ်ပေါက်လာပြီး စစ်မှန်သော ဒီမိုကရေစီပြည်ထောင်စုကြီး တည်ဆောက်နိုင်မည်ဖြစ်သည်။

မည်သို့ဆိုစေ အချိန်ကန့်သတ်မှုအတွင်း “ပြိုင်တူတွန်းလျှင် ရွေ့နိုင်ပါသည်” ဟူသောစကားအတိုင်း အစိုးရသစ်နှင့် ပြည်သူတရပ်လုံးကပူးပေါင်းဆောင်ရွက်ကာ ပြည်ထောင်စုမြန်မာနိုင်ငံတော်ကြီးကမ္ဘာ့အလယ် တွင် ထည်ထည်ဝါ၀ါ ဂုဏ်သိက္ခာရှိစွာဖြင့် လူတိုင်းဘ၀ကိုယ်စီ အလှကိုယ်စီ အမြန်ဆုံးပျော်ရွှင်ခံစားနိုင်စေရန် လုပ်ဆောင်ကြစို့ဟု “မိုးမခ” မှ တိုက်တွန်းနှိုးဆော်လိုက်ပါသည်။

Ref: MoeMaKha

Posted in: ၀၈။ ဆောင်းပါး